ఉత్తరాంధ్రలో భారీ వర్షాలు: జనజీవనం అతలాకుతలం, ముగ్గురు మృతి

ఉత్తరాంధ్ర, ఉమ్మడి గోదావరి జిల్లాల్లో భారీ వర్షాలు కురుస్తున్నాయి. తీవ్ర వాయుగుండం ప్రభావంతో వాగులు, గెడ్డలు పొంగిపొర్లుతున్నాయి. వందల ఎకరాల్లో పంటలు నీట మునిగాయి.

విశాఖపట్నంలో కొండవాలు ప్రాంతాల్లో రక్షణ గోడలు కూలాయి. మధురవాడ కార్పెంటర్ కాలనీలో ప్రహరీ గోడ కూలింది. PM పాలెంలో అపార్టుమెంటు రక్షణ గోడ కూలిపోయింది. హనుమంతవాకలో రక్షణ గోడ ఇంటిపై పడింది. దీంతో మూడు కుటుంబాల ఇల్లు పాక్షికంగా కూలింది. ఆరిలోవా రైతు బజార్ నీట మునిగింది.

అనకాపల్లి జిల్లా ఎస్.రాయవరం మండలంలో వరాహా నది నిండుగా ప్రవహిస్తోంది. అల్లూరి సీతారామరాజు జిల్లాలో కొండచరియలు విరిగిపడ్డాయి. పాడేరు ఘాట్ రోడ్డును అధికారులు తొలగించారు. బత్తనూరులో వాగు దాటుతూ ఇద్దరు యువకులు కొట్టుకుపోగా చెట్టు సాయంతో బయటపడ్డారు.

విజయనగరం, శ్రీకాకుళం జిల్లాల్లో నాగావళి, వంశధార నదులు ఉధృతంగా ప్రవహిస్తున్నాయి. బొబ్బిలి, టెక్కలి, ఇచ్ఛాపురం ప్రాంతాల్లో రహదారులు జలమయమయ్యాయి. సుమారు 350 ఎకరాల పంటలు మునిగాయి. నరసన్నపేట సబ్‌డివిజన్‌లో 50 విద్యుత్ స్తంభాలు నేలకొరిగాయి.

కృష్ణా, ఎన్టీఆర్, గుంటూరు జిల్లాల్లోనూ వర్షం ప్రభావం కనిపించింది. విజయవాడలో రహదారులు నీటిలో నిలిచాయి. పెదకళ్ళేపల్లిలో కరెంటు తీగ తెగిపడి సామ్రాజ్యం అనే మహిళ మృతి చెందింది. బాపట్ల జిల్లా ఉప్పరపాలెంలో విద్యుత్ వైరు తగిలి రమాదేవి, ఆమె కుమారుడు వెంకటేశ్వర్లు చనిపోయారు. నున్న వద్ద కారు కొట్టుకుపోతుండగా స్థానికులు దంపతులను కాపాడారు.

సీఎం చంద్రబాబు అధికారులతో సమీక్ష నిర్వహించారు. వాన నీటిని ఒడిసిపట్టి రిజర్వాయర్లు, చెరువులు నింపాలని ఆదేశించారు. అవసరమైతే మొబైల్ లిఫ్టులు, మోటార్లు వినియోగించాలన్నారు. గోదావరి, కృష్ణా, నాగావళి, వంశధార బేసిన్లపై నిరంతర పర్యవేక్షణ కొనసాగించాలన్నారు. ఉపముఖ్యమంత్రి పవన్ కళ్యాణ్ కాకినాడ కలెక్టర్‌తో సమీక్షించి, లోతట్టు ప్రాంతాల ప్రజలను తరలించాలని సూచించారు.