కాళేశ్వరం మోటార్లు ఆన్ చేయాలని మంత్రి ఉత్తమ్‌కు హరీశ్ రావు లేఖ

మాజీ మంత్రి హరీశ్ రావు రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డికి లేఖ రాశారు. కాళేశ్వరం ప్రాజెక్టు మోటార్లు తక్షణం ఆన్ చేయాలని ఆయన ఆ లేఖలో కోరారు.

ఈ లేఖలో అన్నపూర్ణ, రంగనాయక సాగర్, మల్లన్న సాగర్, కొండపోచమ్మ సాగర్, బసవాపూర్ తదితర రిజర్వాయర్లను నింపాలని హరీశ్ రావు డిమాండ్ చేశారు. ఎల్‌నినో ప్రభావంతో తక్కువ వర్షాలు పడటంతో పాటు ప్రాజెక్టులో నీరు లేక రైతులు ఆందోళన చెందుతున్నారని లేఖలో పేర్కొన్నారు.

దాదాపు నాలుగు లక్షల ఎకరాల ఆయకట్టు పరిధిలోని రైతుల ప్రయోజనాల దృష్ట్యా వెంటనే నీటి పంపింగ్ చేయాలని ఆయన కోరారు. మిడ్ మానేరు నుంచి మోటార్లు ఆన్ చేసి రిజర్వాయర్లను నింపాలని సూచించారు.

ఈ విషయంపై మంత్రి ఉత్తమ్ కుమార్ రెడ్డి స్పందన తెలియాల్సి ఉంది.