రాజమహేంద్రవరం పులి ఇప్పుడు అడవిలో ఉంది: అటవీ శాఖ వెల్లడి

రాజమహేంద్రవరం సమీపంలో కలకలం సృష్టించిన పులి ఇప్పుడు అటవీ ప్రాంతంలోకి వెళ్ళిపోయిందని రాష్ట్ర అటవీ శాఖ ముఖ్య సంరక్షణాధికారి చలపతిరావు తెలిపారు. GPS ట్రాకర్ ద్వారా పులి ఎక్కడుందో, ఏ ఏ ప్రాంతాల్లో తిరుగుతుందో నిరంతరం పర్యవేక్షిస్తున్నట్లు ఆయన వెల్లడించారు.

పులి చాలా దట్టమైన అడవిలోకి వెళ్ళిపోయిందని, అది బయటకు రాకుండా అడవిలోనే తన పరిధిని ఏర్పాటు చేసుకునే పనిలో ఉందని అధికారులు తెలిపారు. పులికి అవసరమైన ఆహారాన్ని అందుబాటులో ఉండేలా చర్యలు చేపట్టారని, వేట జంతువుల సంఖ్యను పెంచే దిశగా కృషి చేస్తున్నట్లు చెప్పారు.

పులికి ఇప్పటికే సాటిలైట్ కాలర్ అమర్చి ఉన్నందున దాని కదలికలను నిరంతరం పర్యవేక్షిస్తున్నారు. పులి అడవిలోనే అలవాటు పడి అక్కడే నివసిస్తే అది మంచిదేనని అధికారులు అభిప్రాయపడ్డారు. ప్రజలకు ఎటువంటి ముప్పు లేకుండా పులి అడవిలోనే ఉండేలా చూసేందుకు అటవీ శాఖ నిరంతర పహారా కొనసాగిస్తోందని తెలిపారు.