ఒమన్ లో ఇబ్బందుల్లో చిక్కుకున్న రాజమండ్రి మహిళ స్వదేశానికి

ఒమన్ లోని మస్కట్ లో ఇబ్బందులు పడుతున్న రాజమండ్రి మహిళ స్వదేశానికి చేరుకున్నారు. దుర్గా భవాని అనే ఈ మహిళ ఏజెంట్ ద్వారా 2024 ఆగస్టులో ఒమన్ వెళ్లారు. అక్కడ గృహ సహాయకురాలిగా పనిచేసేందుకు వెళ్లిన ఆమె తీవ్ర ఇబ్బందులు ఎదుర్కొన్నట్లు తెలిపారు.

తనకు జీతం ఇవ్వలేదని, ఫోన్ తీసేసుకుని బంధించారని దుర్గా భవాని ఆరోపించారు. అనారోగ్యం పాలైనా సరిగ్గా వైద్యం అందించలేదని, బెదిరించి పని చేయించుకున్నారని ఆమె చెప్పారు. తన వేదనను సోషల్ మీడియాలో వీడియో రూపంలో పంచుకున్నారు. ఈ వీడియో ఎన్ఆర్ఐ టీడీపీ నాయకులు నాగరాజు, రాజశేఖర్ లకు చేరడంతో వారు స్పందించారు.

వారి సహకారంతో ఏపీ ప్రభుత్వ ఎన్ఆర్టీ విభాగం ఆమెను భారతదేశానికి తీసుకువచ్చింది. ఈ విషయమై ఏపీఎన్ఆర్టీ ప్రతినిధి రాజశేఖర్ మాట్లాడుతూ, ముఖ్యమంత్రి చంద్రబాబు నాయుడు ఆదేశాల మేరకు ఇలాంటి సమస్యలపై దృష్టి పెడుతున్నామని చెప్పారు. ఇలాంటి ఇబ్బందుల్లో ఉన్నవారు స్థానిక టీడీపీ కార్యకర్తలు లేదా కలెక్టర్ ఆఫీస్ ద్వారా సహాయం పొందవచ్చని ఆయన వివరించారు.

దుర్గా భవాని రాజమండ్రిలోని తన కుటుంబాన్ని చేరుకున్నారు. తనను రక్షించిన నాగరాజు, రాజశేఖర్ మరియు ఎంబసీ అధికారులకు ఆమె కృతజ్ఞతలు తెలిపారు. తనను బెదిరిస్తున్న ఏజెంట్ సలీం పై పోలీసులకు ఫిర్యాదు చేస్తానని చెప్పారు. విదేశాల్లో ఇలాంటి కష్టాలు ఎదుర్కొంటున్న తెలుగు వారికి ప్రభుత్వం అండగా ఉంటుందని రాజశేఖర్ హామీ ఇచ్చారు.