గుంటూరులో రైతు పండించిన అరుదైన మిరప రకానికి ఎగుమతి వ్యాపారుల నుండి భారీ డిమాండ్

గుంటూరు జిల్లా తిక్కిరెడ్డిపాలెం రైతు చిట్టినేని అమర్నాథ్ సాగు చేసిన 'సూపర్టన్ డీలక్స్' నాటు మిరప రకానికి ఎగుమతి వ్యాపారుల నుండి భారీ డిమాండ్ వచ్చింది. నాలుగు ఎకరాల్లో పండించిన ఈ మిరప క్వింటా ధర రూ.32,000 వరకు పలికింది.

ఈ ఏడాది జనవరిలో తొలి కాపు రాగా, అప్పట్లో ధర తక్కువగా ఉన్నందున 80 క్వింటాళ్ల దిగుబడిని శీతల గోదాములో నిల్వ చేశారు. గత రెండు నెలలుగా గుంటూరు మిర్చి యార్డులో ధరలు పెరగడంతో, అమర్నాథ్ శాంపిల్ కాయలను తీసుకెళ్లి చూపించగా, ఎర్రగా మెరిసే మచ్చలు లేని కాయలను చూసి వ్యాపారులు ఆకర్షితులయ్యారు.

క్వింటా రూ.25,000 వద్ద బిడ్డింగ్ మొదలై, వ్యాపారుల పోటీతో ధర క్రమంగా రూ.32,000కు చేరుకుంది. అయితే, మరింత మెరుగైన ధర వస్తుందని భావించిన అమర్నాథ్ అమ్మకాన్ని నిలిపివేశారు.

సేంద్రియ ఎరువులకు ప్రాధాన్యత ఇవ్వడం, సొంత ట్రాక్టర్ సాయంతో సాగు చేయడం వల్ల కాయ రంగు, సైజు బాగా వచ్చాయని, రసాయనాల వాడకం లేకపోవడంతో ఈ మిరప ఎగుమతికి అనుకూలంగా ఉందని అమర్నాథ్ తెలిపారు.