సాయికృష్ణ కస్టోడియల్ మరణం: సీఐ నాగరాజుపై SIT విచారణ ఐదో రోజు, సహకారం లేదు

సాయికృష్ణ కస్టోడియల్ మరణం కేసులో సీఐ నాగరాజును SIT విచారించడం ఐదో రోజు కొనసాగింది. విజయవాడలోని కృష్ణలంక పోలీస్ స్టేషన్‌లో గతంలో జరిగిన ఈ సంఘటనపై SIT అధికారులు ఉదయం 10 గంటల నుంచి సాయంత్రం 5 గంటల వరకు నాగరాజును ప్రశ్నించారు.

కస్టడీలో సాయికృష్ణ మరణానికి దారితీసిన పరిస్థితులు, కస్టోడియల్ టార్చర్ ఎందుకు జరగాల్సి వచ్చింది, మృతదేహాన్ని మాయం చేసిన అంశం, స్వర్గపురిలో ఉన్న గుర్తు తెలియని మృతదేహాల జాబితాలో సాయికృష్ణ శవం ఉందా వంటి విషయాలపై SIT ప్రశ్నల వర్షం కురిపించింది.

సాయికృష్ణ తల్లి విజయలక్ష్మి ఇచ్చిన ఫిర్యాదు ప్రకారం, నాగరాజు ఆమెకు ఫోన్ చేసి ‘డెడ్ బాడీకి దండ వేసి ఫోటో తీయండి’ అని బెదిరించినట్లు ఆరోపణలు ఉన్నాయి. ఈ ఆరోపణలపై కూడా నాగరాజును ప్రశ్నించారు. ఈ కేసులో నిందితుడు సురేష్ అనే వ్యక్తి పరారీలో ఉన్నాడు. సురేష్‌తో నాగరాజుకు ఉన్న సంబంధాలపై కూడా SIT విచారణ జరుపుతోంది.

అంతేకాకుండా, ఒక మహిళా ఎస్‌ఐ, డెలివరీ బాయ్, ప్రత్యక్ష సాక్షి, ఆర్‌ఎంపీ డాక్టర్ లాంటి వారి ప్రకటనలను ఆధారంగా చేసుకుని నాగరాజును ప్రశ్నిస్తున్నారు. అయితే నాగరాజు పూర్తిగా సహకరించడం లేదని, చాలా ప్రశ్నలకు మౌనంగా ఉంటున్నారని లేదా తనకు సంబంధం లేదంటూ సమాధానం ఇస్తున్నారని సమాచారం.

సుప్రీంకోర్టు ఆదేశాలతో ఈ విచారణ మొత్తం సీసీ కెమెరాల్లో రికార్డు అవుతోంది. SIT అధికారులు మరో రెండు రోజులు విచారణ కొనసాగించి, ఏడో రోజు సాయంత్రం నాగరాజును కోర్టులో హాజరుపరచనున్నారు. సాయికృష్ణ తల్లి హైకోర్టులో దాఖలు చేసిన హెబియస్ కార్పస్ పిటిషన్ ఇంకా పెండింగ్‌లో ఉంది.