కాకినాడ సమీపంలో కాలేశ్వరం ఫ్యాక్టరీ బూడిద వ్యర్థాలపై నిరసన; యాజమాన్యం హామీ

కాకినాడ రూరల్ నియోజకవర్గంలోని కాలేశ్వరం ఫ్యాక్టరీ నుండి వెలువడుతున్న బూడిద వ్యర్థాలతో తమ్మవరం, సూర్యరావుపేట గ్రామాల ప్రజలు తీవ్ర ఇబ్బందులు పడుతున్నారు. గ్రామస్తులు ఈ రోజు ఫ్యాక్టరీ వద్ద నిరసన ప్రదర్శించారు.

ఫ్యాక్టరీ నుండి గాలితో ఎగిసే బూడిద ఇళ్లపై, పంట పొలాలపై పడి పంటలు నాశనమవుతున్నాయి. తాగునీటిలో, ఆహారంలో కూడా బూడిద కలిస్తోందని గ్రామస్తులు ఆరోపిస్తున్నారు. ఈ సమస్యపై పలుమార్లు పొల్యూషన్ బోర్డుకు ఫిర్యాదు చేసినా ఎలాంటి చర్యలు తీసుకోలేదని గ్రామస్తులు తెలిపారు. గత సంవత్సరం ఫ్యాక్టరీ యాజమాన్యం రైతులకు ఎకరాకు ₹6000 నష్టపరిహారం ఇచ్చింది. ఈ సంవత్సరం నష్టపరిహారం ఇవ్వబోమని చెప్పడంతో రైతులు ఆగ్రహం వ్యక్తం చేశారు.

నిరసన విషయం తెలుసుకున్న తిమ్మాపురం సర్కిల్ పోలీస్ ఎస్ఐ గణేష్ కుమార్ సంఘటనాస్థలానికి చేరుకొని ఫ్యాక్టరీ యాజమాన్యంతో చర్చించారు. 10 రోజుల్లో ఫ్యాక్టరీలో బాయిలర్ నిలిపివేస్తామని, మూడు రోజుల్లో సమస్య పరిష్కారానికి చర్యలు తీసుకుంటామని యాజమాన్యం హామీ ఇచ్చింది. దీంతో గ్రామస్తులు నిరసన విరమించారు.