కేంద్ర మంత్రి అశ్వినీ వైష్ణవ్ నేడు తెలంగాణ పర్యటన; మేధా రైల్ కోచ్ ఫ్యాక్టరీ సందర్శన, ఐటీ నిపుణులతో సమావేశం

కేంద్ర రైల్వే, కమ్యూనికేషన్స్, ఐటి శాఖ మంత్రి అశ్వినీ వైష్ణవ్ నేడు తెలంగాణలో పర్యటించనున్నారు. ఆయన హైదరాబాద్ ఐటీ నిపుణులు, పారిశ్రామికవేత్తలతో సమావేశమై, రైల్వే ఫ్యాక్టరీలను సందర్శిస్తారు.

ఉదయం 10:30 గంటలకు మాదాపూర్ నోవాటల్ హోటల్‌లో ఐటీ రంగ నిపుణులు, స్టార్టప్ నిర్వాహకులతో మంత్రి ప్రత్యేక చర్చలు జరుపుతారు. దేశీయ సాంకేతికత, రైల్వేల ఆధునికీకరణ, కొత్త టెక్నాలజీల వినియోగంపై ఈ సమావేశంలో చర్చిస్తారు.

మధ్యాహ్నం 2 గంటలకు రంగారెడ్డి జిల్లా శంకరపల్లి మండలం కొండకల్ గ్రామంలోని మేధా రైల్ కోచ్ ఫ్యాక్టరీని సందర్శిస్తారు. దాదాపు 1000 కోట్ల పెట్టుబడితో స్థాపించిన ఈ ఫ్యాక్టరీ దేశంలోనే అతిపెద్ద ప్రైవేట్ రైల్వే కోచ్ తయారీ కేంద్రం. వందే భారత్ ఎక్స్‌ప్రెస్, మెట్రో రైళ్లకు అవసరమైన అధునాతన కోచ్‌లు ఇక్కడ తయారవుతాయి. దేశీయ డిజైన్ సామర్థ్యాలను మంత్రి స్వయంగా పరిశీలిస్తారు.

సాయంత్రం 4 గంటలకు సమీపంలోని మేధా సర్వో డ్రైవ్స్ ఫ్యాక్టరీని కూడా సందర్శిస్తారు. భారతీయ రైల్వేలకు ప్రొపెల్షన్ పరికరాలు సరఫరా చేసే ఈ సంస్థ, కవచ్ రైలు రక్షణ వ్యవస్థ, దేశంలోనే తొలి హైడ్రోజన్ ఇంధన రైలు తయారీలో కీలక భాగస్వామిగా ఉంది. ఆయా ప్రాజెక్టుల ప్రగతిని మంత్రి సమీక్షించనున్నారు.

ఈ పర్యటన ద్వారా తెలంగాణలో రైల్వే, సాంకేతిక రంగాలకు సంబంధించిన కేంద్ర ప్రాజెక్టులను మంత్రి పరిశీలించనున్నారు.