అసోం వరద విధ్వంసం: శివసాగర్ లో బాధితులతో సీఎం హిమంత సంభాషణ

అసోంలో వరదలు విధ్వంసం సృష్టిస్తున్నాయి. సీఎం హిమంత బిస్వ శర్మ శివసాగర్ జిల్లాలో వరద బాధితులను పరామర్శించారు. వరదల వల్ల జరిగిన నష్టం టీవీల్లో కనిపించే దానికంటే ఘోరంగా ఉందని సీఎం ఆవేదన వ్యక్తం చేశారు. ప్రభుత్వం తరఫున బాధితులకు పూర్తి సహాయ సహకారాలు అందిస్తామని హామీ ఇచ్చారు. సీఎం ఉదయం 7 గంటలకే శివసాగర్ చేరుకుని, గ్రామస్థుల మధ్య తిరిగారు. ఒక బాధిత మహిళ మాట్లాడుతూ, తన ఇల్లు పూర్తిగా కూలిపోయిందని, తలదాచుకునేందుకు నీడ లేదని కన్నీటి పర్యంతమైంది. ఆకలిని తీర్చుకునేందుకు రేషన్ వస్తోంది కానీ ఇల్లు లేదని, పునరావాసం కల్పించాలని కోరింది. ఇంకొక బాధితురాలు, ఆమె ఓ 12వ తరగతి విద్యార్థిని. తన ఇల్లు కూలిపోయిందని, పుస్తకాలు, బట్టలు అన్నీ పోయాయని ఆమె కన్నీళ్లు పెట్టుకుంది. ఫైనల్ పరీక్షలు రాసేందుకు పుస్తకాలు కూడా లేవని, కాలేజీ ఫీజు చెల్లించేందుకు డబ్బులు లేవని విలపించింది. విద్యార్థులకు ప్రత్యేక సాయం చేయాలని సీఎంను అభ్యర్థించింది. సీఎం స్పందిస్తూ, ఈ కుగ్రామాన్ని పూర్తిగా పునర్నిర్మిస్తామని హామీ ఇచ్చారు. వరద బాధితులందరికీ ప్రభుత్వం అండగా ఉంటుందని చెప్పారు. అసోంలో భారీ వరదలతో పలు గ్రామాలు నీటిలో మునిగిపోయాయి. ఈ సందర్భంగా సీఎం హిమంత స్వయంగా వెళ్లి, బాధితులకు భరోసా కల్పించారు.