100 దేశాల నాణేలు, నోట్లను సేకరించిన అసోం వ్యాపారి

అస్సాంలోని గువహటికి చెందిన వ్యాపారవేత్త భారత్ బాగాడియా 100 దేశాలకు చెందిన చారిత్రక నాణేలు, కరెన్సీ నోట్లను సేకరించారు. చరిత్రను కాపాడే ఈ ప్రయత్నం నాణేల సేకరణపై ఆయనకున్న అభిరుచిని వెల్లడిస్తోంది.

బాల్యంలో బాగాడియా తన తండ్రి ఇచ్చిన పాత నాణాలు ఈ ఆసక్తికి బీజం వేశాయి. 1980లో నాణేల సేకరణ మొదలుపెట్టిన ఆయన, ఇప్పటికీ ఈ అలవాటును కొనసాగిస్తున్నారు. దేశంలోని నాలుగు ప్రధాన నాణేల ముద్రణ కేంద్రాల గురించి అధ్యయనం చేసిన తర్వాత ఆయన సేకరణ మరింత విస్తరించింది.

2008 నుంచి విదేశీ నాణేలు, నోట్ల సేకరణ ప్రారంభించారు. వీటి కోసం ప్రత్యేక ఆల్బమ్‌లు తయారు చేశారు. భారతదేశం నుంచి వివిధ దేశాలకు చెందిన అరుదైన నమూనాలను తన వద్ద భద్రపరిచారు.

ఆయన సేకరణలో అహోం రాజవంశం నాటి నాణాలు, అశోకుడి కాలం నాటి నాణాలు, హైదరాబాద్ నిజాం నాణాలు, బ్రిటిష్ కాలం వెండి నాణాలు ప్రత్యేక ఆకర్షణగా ఉన్నాయి.