బాల్టిమోర్‌లో జులై 31 నుంచి ఆటా మహాసభ: 150 మంది వీఐపీలు, 50 దేశాల ప్రతినిధులు హాజరు

అమెరికన్ తెలుగు అసోసియేషన్ (ATA) 19వ ద్వైవార్షిక మహాసభ బాల్టిమోర్ నగరంలో జులై 31 నుంచి ఆగస్టు 2 వరకు జరగనుంది. ఈ సమావేశానికి 50 దేశాల నుంచి 12,000 మంది ప్రతినిధులు, 150 మంది వీఐపీలు హాజరుకానున్నారు.

ఈ మహాసభలో సాంస్కృతిక ప్రదర్శనలు, క్రీడా పోటీలు, యువత, మహిళా కార్యక్రమాలు, బిజినెస్ స్టార్టప్ ఐడియా బాజ్, కృత్రిమ మేధ (AI) పై అవగాహన సెషన్లు నిర్వహిస్తున్నారు. విదేశాల్లో స్థిరపడే తెలుగు విద్యార్థులకు ఇమ్మిగ్రేషన్, గ్రీన్ కార్డ్ సమస్యలపై న్యాయ సలహాలు కూడా అందించనున్నారు.

భారత్ నుంచి తెలంగాణ సీఎం రేవంత్ రెడ్డి, ఏపీ సీఎం చంద్రబాబు నాయుడు, ప్రతిపక్ష నేతలు కేటీఆర్, హరీశ్ రావు, వైసీపీ అధినేత జగన్మోహన్ రెడ్డి, కేంద్ర మంత్రి కిషన్ రెడ్డి తదితరులను ఆహ్వానించారు. సినీ రంగం నుంచి దిల్ రాజు, పూజా హెగ్డే, మీనాక్షి చౌదరి వంటి ప్రముఖులు కూడా హాజరయ్యే అవకాశం ఉంది. అమెరికా వైపు నుంచి మేరీల్యాండ్ గవర్నర్, లెఫ్టినెంట్ గవర్నర్ అరుణా మిల్లర్, వర్జీనియా లెఫ్టినెంట్ గవర్నర్ గాజాలా, బాల్టిమోర్ మేయర్ పాల్గొంటారు.

ATA గత 40 ఏళ్లుగా తెలుగు సమాజ సేవ, విద్య, సాంకేతిక శిక్షణ, గ్రామీణాభివృద్ధి కార్యక్రమాలు చేపడుతోంది. ఈసారి కూడా సంప్రదాయ కార్యక్రమాలతో పాటు ప్రపంచ తెలుగు సమాజాన్ని ఒకే వేదికపైకి తీసుకురావడమే లక్ష్యంగా నిర్వాహకులు తెలిపారు. ఏర్పాట్లను 400 మంది వాలంటీర్లు, 70 ఆహ్వాన కమిటీలు చూస్తున్నాయి.