తమిళనాడు: మూడో బిడ్డకు 365 రోజుల పూర్తి వేతనంతో సెలవు

తమిళనాడు ప్రభుత్వం ప్రభుత్వ మహిళా ఉద్యోగులకు మూడో బిడ్డకు 365 రోజుల పూర్తి వేతనంతో కూడిన ప్రసూతి సెలవు మంజూరు చేస్తూ ఉత్తర్వులు జారీ చేసింది. ఇప్పటి వరకు మూడో బిడ్డకు 12 వారాల సెలవు మాత్రమే ఇచ్చేవారు.

కొత్త ఉత్తర్వుల ప్రకారం మూడో బిడ్డకు కూడా 365 రోజుల పూర్తి జీతంతో కూడిన సెలవు లభిస్తుంది. ఉద్యోగం కోల్పోవాల్సిన పరిస్థితి లేకుండా మహిళా ఉద్యోగులు బిడ్డల పెంపకం చూసుకోవచ్చని ప్రభుత్వం తెలిపింది.

తమిళనాడులో సంతానోత్పత్తి రేటు 1.4కు పడిపోయినట్టు ప్రభుత్వం పేర్కొంది. జనాభా స్థిరంగా ఉండాలంటే ఈ రేటు 2.1 ఉండాలని జనాభా నిపుణులు చెబుతున్నారు. భవిష్యత్తులో యువత సంఖ్య తగ్గి వృద్ధుల సంఖ్య పెరిగే పరిస్థితి రాకుండా ఈ నిర్ణయం తీసుకున్నారు.

కొన్ని ఉద్యోగ సంఘాలు ఇతర రాష్ట్రాల్లోనూ ఇలాంటి సెలవు విధానం అమలు చేయాలని డిమాండ్ చేశాయి.