హైదరాబాద్‌లో ఎస్బీఐ ఏటీఎం క్యాష్ వ్యాన్ డ్రైవర్ ₹17 లక్షలతో పరారీ

హైదరాబాద్ లోని సంతోష్ నగర్, రైన్ బజార్ ప్రాంతంలో ఎస్బీఐ ఏటీఎం‌కు నగదు నింపే వాహనం డ్రైవర్ ₹17 లక్షలు తీసుకుని పారిపోయాడు. ఐఎస్ సదన్ పోలీస్ స్టేషన్ పరిధిలో ఈ ఘటన జరిగింది.

హిటాచి కన్సల్టెన్సీ సంస్థకు చెందిన సిబ్బంది ఎస్బీఐ ఏటీఎం మిషిన్‌లో నగదు నింపడానికి వాహనంలో వచ్చారు. వాహనాన్ని సదరు రోడ్డుపై ఆపిన తర్వాత, ఇద్దరు సిబ్బంది ఏటీఎం లోపలికి వెళ్లారు. డ్రైవర్ శ్రీనివాస్ మాత్రం వాహనంలో ఉన్నాడు. ఆ సమయంలో అతను వెనక డోర్ తెరిచి, లోపల ఉన్న ₹17 లక్షల నగదు బ్యాగ్ తీసుకున్నాడు. ముందస్తు ప్రణాళిక ప్రకారం, అక్కడే ఒక బైక్ తో ఎదురుచూస్తున్న సహచరుడితో కలిసి అక్కడి నుంచి పారిపోయాడు.

పోలీసులు ఘటనపై కేసు నమోదు చేసి దర్యాప్తు ప్రారంభించారు. నిందితుడు శ్రీనివాస్ జగిత్యాల జిల్లాకు చెందిన వ్యక్తిగా గుర్తించారు. చాలా రోజులుగా అతను ఇలాంటి అవకాశం కోసం ఎదురుచూస్తున్నట్లు తెలుస్తోంది. ప్రస్తుతం నాలుగు ప్రత్యేక పోలీసు బృందాలు, టాస్క్ ఫోర్స్ అతని కోసం గాలిస్తున్నారు. సంఘటనా స్థలం పరిసరాల్లోని సీసీ కెమెరాల ఫుటేజీని పరిశీలిస్తున్నారు.

నిందితుడు, అతని సహచరుడు ఎక్కడికి వెళ్లారనేది ఇంకా తెలియరాలేదు. గాలింపు చర్యలు కొనసాగుతున్నాయి.