అత్తాపూర్ కిడ్నాప్ కేసు: పోలీసులు ఐదు టీమ్లు ఏర్పాటు చేశారు

హైదరాబాద్ అత్తాపూర్‌లో యువతిని థార్ వాహనంలో తీసుకెళ్లిన కేసులో పోలీసులు దర్యాప్తు చేస్తున్నారు. Hyderabad CP సజ్జనార్ ఆదేశాల మేరకు ఐదు ప్రత్యేక టీమ్‌లు ఏర్పాటు చేశారు.

రాత్రి 10:30 గంటల సమయంలో యువతి అత్తాపూర్‌లోని సూపర్ మార్కెట్‌కు ఆటోలో వచ్చింది. అక్కడ చాక్లెట్లు, వాటర్ బాటిల్స్ కొన్నది. బయటికి వచ్చే సమయానికి నల్ల రంగు థార్ వాహనం, తెల్ల రంగు Honda Activa అక్కడ ఉన్నాయి.

వారిని చూసి భయపడిన యువతి పక్కనే ఉన్న జాయ్ హాస్పిటల్‌లోకి పరిగెత్తింది. హాస్పిటల్ సూపర్‌వైజర్‌తో తనను ముగ్గురు వెంబడిస్తున్నారని, సహాయం చేయమని కోరింది. మెరూన్ రంగు చొక్కా వేసుకున్న వ్యక్తి హాస్పిటల్ లోపలికి వచ్చి సిబ్బందిని బెదిరించాడు. యువతి తమకు తెలుసని, ఎవరూ మధ్యలో రావద్దని చెప్పాడు.

హాస్పిటల్ సిబ్బంది ప్రకారం, యువతి తర్వాత తానే నడుచుకుంటూ బయటికి వచ్చి థార్ వాహనంలో వెళ్లింది. బలవంతంగా ఎక్కించుకున్నట్లు కనపడలేదని సిబ్బంది తెలిపారు. అయితే బెదిరించి తీసుకెళ్లారని స్పష్టంగా చెప్తున్నారు.

స్థానికులు Dial 100కు కాల్ చేశారు. హాస్పిటల్ సూపర్‌వైజర్ మహేష్ ఫిర్యాదు మేరకు కేసు నమోదు చేశారు. మూడు పోలీస్ కమిషనరేట్ల పరిధిలో ఈ యువతి పేరున మిస్సింగ్ కేసు గానీ కిడ్నాప్ కేసు గానీ నమోదు కాలేదని, కుటుంబం నుంచి ఫిర్యాదు రాలేదని పోలీసులు తెలిపారు.

వాహనానికి నెంబర్ ప్లేట్ లేకపోవడంతో అత్తాపూర్ నుంచి ఆరంగర్ వరకు CCTV ఫుటేజ్ పరిశీలించారు. సూపర్ మార్కెట్‌లో యువతి చేసిన Paytm ట్రాన్సాక్షన్ ఆధారంగా ఆమె ఫోన్ నంబర్ గుర్తించారు. ఆ నంబర్ ఆధారంగా ఆమె వివరాలు సేకరించే ప్రయత్నం జరుగుతోంది. హాస్పిటల్ సూపర్‌వైజర్ ఆమె పేరు నవనీత అని చెప్పారు. అయితే ఇంకా ధృవీకరించాల్సి ఉంది.