అయోధ్య రామాలయ ట్రస్ట్ సీఈఓ పోస్టుకు 5,000కు పైగా దరఖాస్తులు; జూలై 22లోపు నియామకం

అయోధ్య శ్రీరామ జన్మభూమి తీర్థ క్షేత్ర ట్రస్ట్ సీఈఓ పదవికి 5,000కు పైగా దరఖాస్తులు వచ్చాయి. ఈ ఒక్క పోస్టు కోసం రిటైర్డ్ ఐఏఎస్, ఐపీఎస్, ఐఆర్ఎస్ అధికారుల నుంచి భారత సైన్యం సీనియర్ అధికారులు, ప్రజాసేవ, మేనేజ్‌మెంట్ రంగాల్లో అనుభవం ఉన్నవారు దరఖాస్తు చేసుకున్నారు.

ట్రస్ట్ బోర్డు ఈ నియామకానికి ముగ్గురు సభ్యులతో సెర్చ్ కమిటీ ఏర్పాటు చేసింది. ఈ కమిటీలో రిటైర్డ్ జస్టిస్ ప్రమోద్ కోహిలీ, లెఫ్టినెంట్ జనరల్ విష్ణుకాంత్ చతుర్వేది, సాయిబాబా సంస్థాన ట్రస్ట్ మాజీ చైర్మన్ సురేష్ హవారే ఉన్నారు. దరఖాస్తులను పరిశీలించి, స్క్రీనింగ్, షార్ట్‌లిస్టింగ్, ఇంటర్వ్యూల ద్వారా తుది ఎంపిక చేస్తారు. జూలై 22 నాటికి సీఈఓ నియామక ప్రక్రియ పూర్తి కానుంది.

ట్రస్ట్ పరిపాలనను మరింత వృత్తిపరంగా, పారదర్శకంగా తీర్చిదిద్దేందుకు ఈ కొత్త పదవిని ఏర్పాటు చేశారు. సీఈఓ రోజువారీ కార్యకలాపాలు, ఆలయ నిర్వహణ, సిబ్బంది నిర్వహణ బాధ్యతలు నిర్వర్తిస్తారు. ప్రధాన విధాన నిర్ణయాలు మాత్రం ట్రస్ట్ బోర్డే తీసుకుంటుంది.