నిర్మల్ జిల్లాలో ఆయుర్వేద వైద్యుడు రారైన మియాజాకి మామిడి సాగులో విజయం

నిర్మల్ జిల్లా కడెం మండలం నవాబుపేటకు చెందిన ఆయుర్వేద వైద్యుడు రాపల్లి సత్యం ప్రపంచంలోనే అత్యంత ఖరీదైన మియాజాకి మామిడి పండ్లను సాగు చేశారు.

ఆయన తనకున్న ఒక ఎకరం 10 గుంటల భూమిలో ఆయుర్వేద ఆశ్రమం నిర్వహిస్తున్నారు. ఆ ప్రాంగణంలో వివిధ ఆయుర్వేద మొక్కలతో పాటు జపాన్‌కు చెందిన ఈ ప్రత్యేక మామిడి మొక్కలను కూడా పెంచారు.

సాధారణంగా శీతల ప్రాంతాల్లో మాత్రమే పెరిగే ఈ రకాన్ని తెలంగాణ వాతావరణంలో పండించడం సత్యంకు సవాల్‌గా మారింది. రెండేళ్ల కిందట కోల్‌కతా నుంచి లక్ష రూపాయలతో పది మొక్కలను తెచ్చిన ఆయన, వాటిని ఆర్గానిక్ పద్ధతిలో సంరక్షించారు.

పది మొక్కల్లో ఆరు మొక్కలు మాత్రమే నిలిచాయి. కేవలం రెండేళ్లలోనే ఈ చెట్లు పండ్లు కాసే దశకు వచ్చాయి. ఈ ఏడాది 20 కాయలు కాశాయని సత్యం తెలిపారు. అయితే కొన్ని కాయలు ఎండకు కాలిపోయాయి.

అంతర్జాతీయ మార్కెట్లో ఒక్కో మియాజాకి మామిడి పండు లక్షల్లో ధర పలుకుతుంది. ఈ మామిడి సాగుపై తెలంగాణ రైతులు కూడా దృష్టి పెట్టాలని సత్యం సూచిస్తున్నారు. తనకు వ్యవసాయంలో లాభం కన్నా, సేంద్రీయ సాగులో మరింత మంది రైతులు ప్రోత్సాహం పొందాలనే ఆశ ఉంది.