తిరుపతి SV జూ అభివృద్ధిపై స్పీకర్ అయ్యన్నపాత్రుడు దృష్టి

తిరుపతిలోని శ్రీ వెంకటేశ్వర జంతు ప్రదర్శన శాల (SV జూ) అభివృద్ధిపై ఆంధ్రప్రదేశ్ శాసనసభ స్పీకర్ అయ్యన్నపాత్రుడు ప్రత్యేక దృష్టి సారించారు.

ఆయన జూ పార్కును సందర్శించి, అభివృద్ధి పనులకు అవసరమైన నిధుల అంచనాలు రూపొందించేందుకు అధికారులతో సమీక్షించారు. తక్షణ అభివృద్ధి పనులకు రూ.8 కోట్ల బడ్జెట్ అవసరమని తెలిపారు.

నిధుల సమీకరణలో టిటిడి నుంచి రూ.3 కోట్లు, ఎంపీ నిధుల నుంచి రూ.2 కోట్లు ఇప్పించేలా చర్చిస్తామని, మిగిలిన నిధులు ఇతర మార్గాల ద్వారా సమకూర్చేందుకు ప్రయత్నిస్తామని స్పీకర్ వివరించారు.

ఆసియా ఖండంలోని అతిపెద్ద జూ పార్కుల్లో ఒకటిగా ఉన్న ఈ 31 ఎకరాల జూను మరింత అభివృద్ధి చేసి, నైట్ సఫారీ, టాయ్ ట్రైన్ వంటి సౌకర్యాలు ఏర్పాటు చేసే అవకాశాలను పరిశీలిస్తున్నట్లు అయ్యన్నపాత్రుడు తెలిపారు. పాడైన ప్రహారీ గోడ పునర్నిర్మాణం చేయాల్సి ఉందని, పిల్లల కోసం క్యాంటీన్, ఎడ్యుకేషనల్ షోలు వంటి సదుపాయాలు కల్పించాలన్నది ప్రణాళికలో ఉందన్నారు.

అభివృద్ధి పనులను మూడు దశలుగా చేపట్టాలని నిర్ణయించినట్లు ఆయన వివరించారు. ఈ విషయమై కలెక్టర్ కార్యాలయంలో సమావేశం కూడా జరగనుంది.