మోదీ 12 ఏళ్ల పాలన తయారీ రంగానికి 'గాడ్ సెంట్': బాబా కళ్యాణి

ప్రధానమంత్రి నరేంద్ర మోదీ నాయకత్వంలో గత 12 ఏళ్లలో భారత తయారీ రంగం పూర్తిగా కొత్త దిశలోకి మారిందని భారత్ ఫోర్జ్ చైర్మన్ బాబా కళ్యాణి ప్రశంసించారు. మోదీ విధానాలు పారిశ్రామిక రంగానికి 'గాడ్ సెంట్' లాంటివని ఆయన అభివర్ణించారు. మే 2014లో ప్రధానిగా బాధ్యతలు స్వీకరించినప్పటి నుంచి మోదీ ఎక్కడికి వెళ్లినా, ఏం మాట్లాడినా 'భారత్ ఫస్ట్' అనే సూత్రాన్ని పాటించారని కళ్యాణి తెలిపారు.

2014 డిసెంబర్‌లో ప్రారంభించిన 'మేక్ ఇన్ ఇండియా' కార్యక్రమం తయారీ రంగ గమనాన్నే మార్చేసిందని, రక్షణ శాఖలో ఈ కార్యక్రమం రూపకల్పనలో తాను కూడా భాగస్వామినని కళ్యాణి చెప్పారు. లైసెన్సింగ్ విధానంలో మార్పులు, సేకరణ నిబంధనల సరళీకరణతోపాటు పూర్తిగా స్వదేశీ పరిశ్రమలకు రిజర్వ్ చేసిన ఉత్పత్తులు తీసుకొచ్చినట్లు వివరించారు. దివంగత మనోహర్ పారికర్ రక్షణ మంత్రిగా ఉన్నప్పుడు ప్రధాని ఆదేశాలతో అనేక మార్పులు తీసుకొచ్చారన్నారు.

అత్యంత క్లిష్టమైన ఐదో తరం యుద్ధ విమానాల తయారీని సైతం ప్రైవేటు రంగానికి అప్పగిస్తున్నారని కళ్యాణి తెలిపారు. రక్షణ ఎగుమతులు 2014లో కొద్ది వందల కోట్ల రూపాయల నుంచి గతేడాది ₹26,000 కోట్లకు చేరడం గొప్ప మార్పును సూచిస్తోందన్నారు. ఆత్మనిర్భర్ భారత్ విధానాల ద్వారా యువతకు కొత్త ఆవిష్కరణలకు దోహదపడే వాతావరణం కల్పించారని కితాబిచ్చారు.

భారత్ ఇప్పుడు గ్లోబల్ తయారీ కేంద్రంగా అవతరిస్తోందని, చాలా కంపెనీలు యూరప్, అమెరికాల నుంచి ఉత్పత్తిని ఇక్కడికి తరలిస్తున్నాయని కళ్యాణి పేర్కొన్నారు. అయితే చైనా స్థాయికి చేరుకునేందుకు ఇంకా చాలా దూరం ప్రయాణించాల్సి ఉందని, 2047 నాటి లక్ష్యం దిశగా అడుగులు పడాలని సూచించారు.