బాలాపూర్ గణేష్ శోభాయాత్ర, చార్మినార్ శుక్రవారం ప్రార్థనలకు పోలీసు బందోబస్తు

బాలాపూర్ గణేష్ శోభాయాత్ర, శుక్రవారం ప్రార్థనలు చార్మినార్ పరిసరాల్లో ఒకేసారి జరుగుతున్నాయి.

బాలాపూర్ ప్రధాన శోభాయాత్ర చార్మినార్ వద్దకు చేరుకోవడానికి సుమారు గంటన్నర సమయం పడుతుందని పోలీసులు తెలిపారు. అంతకుముందే చార్మినార్ పరిసర ప్రాంతాల్లోని మసీదుల్లో శుక్రవారం ప్రార్థనలు మొదలయ్యాయి. భాగ్యనగర ఆలయంలో హారతి కార్యక్రమం పూర్తయింది.

సౌత్ జోన్ పరిధిలో సుమారు 5,000 మంది పోలీసులు భద్రత కోసం మోహరించారు. చార్మినార్ వద్ద కంట్రోల్ రూమ్ ఏర్పాటు చేశారు. మౌంటెడ్ పోలీసులు, డ్రోన్ పోలీసింగ్ ద్వారా అధికారులు పరిస్థితిని పర్యవేక్షిస్తున్నారు. సౌత్ జోన్ DCP, సీనియర్ IPS అధికారులు భద్రత ఏర్పాట్లను పర్యవేక్షిస్తున్నారు.

సున్నిత ప్రాంతాలుగా గుర్తించిన చోట్ల రాపిడ్ యాక్షన్ ఫోర్స్ బలగాలను ఉంచారు. చార్మినార్, మదీనా మసీదు వద్ద ఐదు కంపెనీల రాపిడ్ యాక్షన్ ఫోర్స్ మోహరించారు. శుక్రవారం ప్రార్థనలు ముగిసే వరకు పోలీసులు ప్రత్యేక ఆంక్షలు అమలు చేస్తున్నారు.

ప్రార్థనలు ముగిసిన తర్వాత బాలాపూర్ గణేష్ విగ్రహం చార్మినార్ వద్దకు చేరుకుంటుంది. మధ్యాహ్నం 12:30 తర్వాత ప్రధాన శోభాయాత్ర మొదలవుతుంది. వేలాది గణేష్ విగ్రహాలు టాంక్ బండ్ వైపు కొనసాగుతాయి. భాగ్యనగర్ ఉత్సవ సమితి చార్మినార్ సమీపంలో స్వాగత కార్యక్రమం ఏర్పాటు చేసింది.