సింగరేణి వ్యాఖ్యల కేసు: బాల్క సుమన్ అరెస్టు, మేజిస్ట్రేట్ ముందు హాజరు

మాజీ ఎమ్మెల్యే, BRS నేత బాల్క సుమన్‌ను పోలీసులు అరెస్టు చేశారు. సింగరేణి కార్మికులకు సంబంధించి వివాదాస్పద వ్యాఖ్యలు చేశారని ఈ నెల 26వ తేదీన నాంపల్లి పోలీస్ స్టేషన్‌లో కేసు నమోదైంది.

ఈ రోజు ఉదయం తెలంగాణ భవన్‌లో పోలీసులు సుమన్‌ను అదుపులోకి తీసుకున్నారు. నాంపల్లి పోలీస్ స్టేషన్‌కు తరలించి ఏడు గంటలపాటు విచారించారు. అనంతరం కింగ్‌కోటి ఆస్పత్రిలో వైద్య పరీక్షలు చేయించారు.

సుమారు రాత్రి 9 గంటల ప్రాంతంలో హిమాయత్ నగర్‌లోని మేజిస్ట్రేట్ నివాసానికి సుమన్‌ను తీసుకువచ్చారు. నాంపల్లి ఆరవ కోర్టుకు సంబంధించిన వెకేషన్ మేజిస్ట్రేట్ ముందు హాజరుపరిచే ప్రక్రియ కొనసాగింది.

విచారణలో సుమన్ ఇచ్చిన స్టేట్‌మెంట్‌లో — ఆ వ్యాఖ్యలు పార్టీ అంతర్గత సమావేశంలో కార్యకర్తలను ఉత్తేజపరచడానికి చేశానని, ఉద్దేశపూర్వకంగా చేయలేదని, ఎటువంటి దురుద్దేశం లేదని చెప్పారు.

పోలీసులు పలు సెక్షన్ల కింద చార్జిషీట్ తయారు చేశారు. రిమాండ్ మంజూరు చేయాలా వద్దా అనే విషయం మేజిస్ట్రేట్ నిర్ణయించాల్సి ఉంది. సుమన్ తరపు న్యాయవాదులు కూడా మేజిస్ట్రేట్ నివాసం వద్దకు చేరుకున్నారు.