బాల్క సుమన్ వ్యాఖ్యలపై హైదరాబాద్‌లో కేసు నమోదు

చెన్నూరు మాజీ ఎమ్మెల్యే, BRS నేత బాల్క సుమన్ రాష్ట్రంలో 'militant action' చేయాలని, సింగరేణి ఆస్తులను తగలబెట్టాలని చేసిన వ్యాఖ్యలపై హైదరాబాద్ నాంపల్లి పోలీస్ స్టేషన్‌లో కేసు నమోదైంది. కాంగ్రెస్ కార్యకర్తల ఫిర్యాదు మేరకు సిటీ పోలీసులు ఈ కేసు నమోదు చేశారు. అదే విషయంపై Abids పోలీస్ స్టేషన్‌లో కూడా మరో కేసు నమోదైంది.

ప్రభుత్వ విప్‌లు అద్దంకి దయాకర్, బల్మూరి వెంకట్ DGP ని కలిసి ఫిర్యాదు అందజేశారు. బాల్క సుమన్‌పై చర్యలు తీసుకోవాలని కాంగ్రెస్ నేతలు DGP కి విజ్ఞప్తి చేశారు.

తెలంగాణ మంత్రి వివేక్ వెంకటస్వామి మాట్లాడుతూ, BRS రైతు ధర్నాలకు రైతులే రావడం లేదని, వారి పార్టీ నేతలే ఒప్పుకున్నారని పేర్కొన్నారు. ధర్నాకు 100 మంది వస్తే అందులో నలుగురు రైతులు కూడా ఉండట్లేదని, అందరూ పార్టీ కార్యకర్తలేనని BRS నాయకులే చెప్పారని ఆయన అన్నారు. ప్రభుత్వ ఆస్తులు ధ్వంసం చేస్తే చట్టపరంగా చర్యలు తీసుకుంటామని మంత్రి హెచ్చరించారు.

కేంద్ర మంత్రి కిషన్ రెడ్డి మాట్లాడుతూ, యువతను హింస వైపు ప్రోత్సహించడం సరికాదని పేర్కొన్నారు. కేంద్ర మంత్రి బండి సంజయ్ విధ్వంసంతో సాధించేది ఏమీ లేదని, ప్రజాస్వామ్యబద్ధంగా ఆందోళన చేయాలని అన్నారు. మంత్రి పొన్నం ప్రభాకర్ రైల్వే పట్టాలు కోసేయాలన్న వ్యాఖ్యలపై రైల్వే శాఖ కేసు నమోదు చేయాలని డిమాండ్ చేశారు.

ఈ విషయంపై BRS స్పందన తెలియాల్సి ఉంది.