ఫీజు రీయింబర్స్‌మెంట్ పథకం రద్దు చేసే కుట్ర జరుగుతోందని బండారు దత్తాత్రేయ ఆరోపణ

హైదరాబాద్ కాచిగూడలో BC విద్యార్థి సంఘం నిర్వహించిన సమావేశంలో హర్యాణా మాజీ గవర్నర్ బండారు దత్తాత్రేయ మాట్లాడారు. తెలంగాణ ప్రభుత్వం BC, SC, ST, మైనారిటీ విద్యార్థుల పట్ల చిన్నచూపు చూస్తోందని ఆయన ఆరోపించారు.

ఫీజు రీయింబర్స్‌మెంట్ పథకాన్ని ఎత్తివేసే ఆలోచనలు ప్రభుత్వానికి ఉందని అనుమానం వ్యక్తం చేశారు. వెనుకబడిన వర్గాల విద్యార్థులకు ఉన్నత చదువులు అవసరమని, ఈ పథకం రద్దు అయితే వారికి అన్యాయం జరుగుతుందని పేర్కొన్నారు.

ఫీజు బకాయిలు ₹8,500 కోట్లు పేరుకుపోగా, ప్రభుత్వం ₹1,000 కోట్లు మాత్రమే చెల్లిస్తామని చెప్పిందని ఆయన తెలిపారు. బకాయిలు చెల్లించలేక కాలేజీ యజమానులు అధ్యాపకులకు జీతాలు ఇవ్వలేకపోతున్నారని, కొన్ని కాలేజీలు మూసే పరిస్థితి వచ్చిందని వివరించారు.

రాష్ట్ర అభివృద్ధికి విద్య అత్యంత కీలకమని, విద్య ద్వారానే వెనుకబడిన వర్గాలు అభివృద్ధి చెందుతాయని బండారు దత్తాత్రేయ అన్నారు. ఈ విషయంపై తెలంగాణ ప్రభుత్వం స్పందన తెలియాల్సి ఉంది.