పోక్సో కేసు: బండి భగీరత్‌కు 14 రోజుల రిమాండ్, చెర్లపల్లి జైలుకు తరళింపు

పోక్సో కేసులో నిందితుడైన బండి భగీరత్‌కు మేడ్చల్ మెజిస్ట్రేట్ 14 రోజుల జుడిషియల్ రిమాండ్ విధించారు. దీంతో పోలీసులు భగీరత్‌ను చెర్లపల్లి జైలుకు తరళించారు.

ఈ నెల 8న ఒక బాలిక తల్లి పేట్ బషీరాబాద్ పోలీస్ స్టేషన్‌లో ఫిర్యాదు చేయడంతో కేసు నమోదైంది. అప్పటి నుంచి భగీరత్ పరారీలో ఉన్నాడు. శనివారం రాత్రి పోలీసులు అతన్ని అరెస్టు చేసి పేట్ బషీరాబాద్ పోలీస్ స్టేషన్‌కు తరళించారు. రెండు గంటల పాటు అతని స్టేట్‌మెంట్ రికార్డు చేశారు.

భగీరత్‌ను అరెస్టు చేయడానికి సైబరాబాద్ పోలీసులు హైదరాబాద్, కరీంనగర్ ప్రాంతాల్లో ఐదు బృందాలతో గాలించారు. బంజారా హిల్స్ సాగర్ సొసైటీలోని కేంద్ర హోం శాఖ సహాయ మంత్రి బండి సంజయ్ నివాసానికి కూడా పోలీసులు వెళ్ళారు. నిందితుడు అక్కడ లేకపోవడంతో గంట తర్వాత వెళ్ళిపోయారు.

రాత్రి 8 గంటల సమయంలో బండి సంజయ్ ప్రకటన విడుదల చేశారు. తాను న్యాయవాదుల ద్వారా కుమారుడిని పోలీసులకు అప్పగించినట్లు తెలిపారు. చట్టంపై గౌరవంతో ఈ నిర్ణయం తీసుకున్నానని పేర్కొన్నారు. తన కుమారుడు ఏ తప్పు చేయలేదని పదే పదే చెబుతున్నాడని కూడా వెల్లడించారు.

కొద్దిసేపటికి అప్పా జంక్షన్ సమీపంలో భగీరత్‌ను అదుపులోకి తీసుకున్నట్లు సైబరాబాద్ పోలీసులు ప్రకటించారు. వైద్య పరీక్షల తర్వాత మేడ్చల్ మెజిస్ట్రేట్ ముందు హాజరు పరిచారు. న్యాయమూర్తి 14 రోజుల రిమాండ్ విధించడంతో పోలీసులు భగీరత్‌ను చెర్లపల్లి జైలుకు తరళించారు.

ఈ కేసులో BNSS సెక్షన్ 183 ప్రకారం జడ్జి సమక్షంలో బాధితురాలి వాంగ్మూలం సేకరించారు. బాధితురాలు మైనర్ బాలికపై సోషల్ మీడియాలో తప్పుడు ప్రచారం చేసిన 14 మందిపై కూడా పేట్ బషీరాబాద్ పోలీసులు కేసులు నమోదు చేశారు.