బండి భగీరథ్ POCSO కేసు: మేడ్చల్ కోర్టులో బాధితురాలి రెండో వాంగ్మూలం నమోదు

బండి భగీరథ్‌పై నమోదైన POCSO కేసులో బాధితురాలు మేడ్చల్ కోర్టులో రెండోసారి వాంగ్మూలం ఇచ్చింది. తల్లిదండ్రులు, మహిళా కానిస్టేబుల్‌తో కలిసి బాధితురాలు మేడ్చల్ జిల్లా కోర్టుకు వచ్చింది.

ఎనిమిదో మెట్రోపాలిటన్ మేజిస్ట్రేట్ సెలవుల్లో ఉండడం వల్ల ఏడో మెట్రోపాలిటన్ మేజిస్ట్రేట్ ఈ వాంగ్మూలం రికార్డు చేశారు. మధ్యాహ్నం మూడు గంటల నుండి సాయంత్రం ఐదున్నర వరకు దాదాపు రెండున్నర గంటల పాటు స్టేట్‌మెంట్ నమోదు జరిగింది. బాధితురాలు మాత్రమే మేజిస్ట్రేట్ ముందుకు వెళ్లింది. తల్లిదండ్రులు, పోలీసులు బయట నిరీక్షించారు. వీడియో రికార్డింగ్‌తో సహా వాంగ్మూలం నమోదైనట్టు తెలుస్తోంది.

హైకోర్టులో జరిగిన వాదనల్లో పలు అంశాలు తెర మీదకు వచ్చాయి. డిసెంబర్ 31 నాటి ఫార్మ్‌హౌస్ సంఘటన సహా నాలుగు వేర్వేరు చోట్ల నేరాలు జరిగాయని ఆరోపణలు ఉన్నాయి. బాధితురాలికి వివిధ పత్రాల్లో వేర్వేరు పేర్లు, పుట్టిన తేదీలు ఉండడంతో దర్యాప్తు అధికారులకు గందరగోళం ఏర్పడింది. అందువల్ల రెండో స్టేట్‌మెంట్ అవసరమైంది.

భగీరథ్ తరపు న్యాయవాది నిరంజన్ రెడ్డి హైకోర్టులో ఆరోపణలను తిరస్కరించారు. సంఘటన అంగీకారంతో జరిగిందని, బాధితురాలు స్వచ్ఛందంగా వచ్చిందని వాదించారు. తమ దగ్గర సంబంధిత footage ఉందని, కోర్టుకు సమర్పిస్తామని చెప్పారు. అయితే హైకోర్టు మధ్యంతర లేదా ముందస్తు బెయిల్‌ మంజూరు చేయడానికి నిరాకరించింది. గురువారం మళ్లీ బెయిల్ పిటిషన్‌పై వాదనలు వినాలని కోర్టు తేల్చింది.

భగీరథ్ ఇప్పటివరకు పోలీసులకు లభ్యం కాలేదు. కేసు నమోదై పలు రోజులు అయినా అరెస్టు జరగలేదు. పోలీసులు గాలింపు చర్యలు ముమ్మరం చేశారు. POCSO చట్టం కింద సెక్షన్లు నమోదైన నేపథ్యంలో 20 ఏళ్లకు పైగా జైలు శిక్ష పడే అవకాశం ఉందని చట్టనిపుణులు పేర్కొంటున్నారు.