POCSO కేసు: బండి భగీరత్ సైబరాబాద్ పోలీస్ కమిషనర్ ముందు లొంగిపోయాడు

బండి సంజయ్ కుమారుడు బండి భగీరత్ సైబరాబాద్ పోలీస్ కమిషనర్ రమేష్ రెడ్డి ముందు లొంగిపోయాడు. న్యాయవాదుల సమక్షంలో అతన్ని కుటుంబ సభ్యులు పోలీసులకు అప్పగించారు. అక్కడి నుంచి పోలీసులు అతన్ని పేట్ బషీరాబాద్ పోలీస్ స్టేషన్‌కు తీసుకెళ్లారు. ఆ స్టేషన్‌లోనే అతనిపై POCSO కేసు నమోదైంది.

ఒక మైనర్ బాలిక తల్లి ఫిర్యాదు ఆధారంగా ఈ కేసు నమోదైంది. బాధితురాలు పోలీసులకు రెండుసార్లు స్టేట్‌మెంట్ ఇచ్చింది. మేడ్చల్ మెజిస్ట్రేట్ ముందు కూడా ఆమె స్టేట్‌మెంట్ నమోదు చేశారు. పోలీసులు నాలుగు ప్రాంతాల్లో పంచనామా నిర్వహించారు.

పోలీసులు చాటింగ్ రికార్డులు, WhatsApp screenshots, వీడియోలు, ఫోటోలు, ఆర్థిక లావాదేవీల వివరాలు సేకరించారు. మొహినాబాద్‌లో డిసెంబర్ 31న జరిగిన పార్టీకి సంబంధించిన ఆధారాలు కూడా లభించాయని పోలీసు వర్గాలు తెలిపాయి.

లొంగిపోవడంలో జాప్యం ఎందుకు జరిగిందని అడిగితే, బండి సంజయ్ మాట్లాడుతూ న్యాయవాదులను సంప్రదించి ఆధారాలు పరిశీలించిన తర్వాత అప్పగించాలని నిర్ణయించినట్టు తెలిపారు. చట్టం ముందు తన కొడుకూ, సామాన్యుడూ ఒక్కటేనని ఆయన పేర్కొన్నారు. న్యాయ వ్యవస్థపై పూర్తి విశ్వాసం ఉందని కూడా చెప్పారు.

మధ్యంతర బెయిల్ కోసం భగీరత్ కోర్టును ఆశ్రయించాడు. అయితే కోర్టు ఇప్పటికే ఎలాంటి ఉపశమనం ఇవ్వలేదు. వచ్చే గురువారం వేకేషన్ కోర్టులో తీర్పు వెలువడే అవకాశం ఉందని జడ్జి పేర్కొన్నారు.