POCSO కేసు: బండి సాయి భగీరథ్‌కు 14 రోజుల రిమాండ్, చెర్లపల్లి జైలుకు తరలింపు

కేంద్ర హోం శాఖ సహాయ మంత్రి బండి సంజయ్ కుమారుడు బండి సాయి భగీరథ్‌కు మేడ్చల్ కోర్టు 14 రోజుల రిమాండ్ విధించింది. అనంతరం అతన్ని చెర్లపల్లి జైలుకు తరలించారు.

ఈ నెల 8న పేట బషీరాబాద్ పోలీసులు ఒక మైనర్ బాలికపై లైంగిక వేధింపుల కేసు నమోదు చేశారు. POCSO చట్టంలోని సెక్షన్ 5సి కింద ఈ కేసు నమోదైంది.

భగీరథ్ నిన్న సాయంత్రం ఇద్దరు సీనియర్ న్యాయవాదుల సమక్షంలో సైబరాబాద్ SOT పోలీసుల ముందు లొంగిపోయాడు. పోలీసులు అతన్ని పేట బషీరాబాద్ పోలీస్ స్టేషన్‌కు తరలించారు. అక్కడ సుమారు రెండు గంటల పాటు విచారణ జరిపారు. తర్వాత మేడ్చల్ ప్రభుత్వ ఆసుపత్రిలో వైద్య పరీక్షలు చేయించి మేడ్చల్ మేజిస్ట్రేట్ ముందు హాజరుపరిచారు.

ఈ కేసుకు సంబంధించి ప్రత్యేకంగా నియమించిన IPS అధికారి రితిరాజ్ భగీరథ్‌ను విచారించారు. మేడ్చల్ కోర్టులో బాధిత బాలిక వాంగ్మూలం కూడా నిన్న ఉదయం నమోదైంది.

తన కుమారుడిని పోలీసులకు అప్పగించానని బండి సంజయ్ ప్రకటించారు. చట్టం ముందు తన బిడ్డ అయినా సామాన్యుడైనా సమానమేనని ఆయన పేర్కొన్నారు. ఈ నెల 18న కోర్టు ఉత్తర్వులు వెలువడే అవకాశం ఉన్నా ఆలస్యం వద్దని కుమారుని లొంగిపోయేలా చేశానని తెలిపారు. తమ వద్ద ఉన్న ఆధారాలు పరిశీలించిన న్యాయవాదులు కేసు కొట్టేస్తారని, బెయిల్ వస్తుందని చెప్పారని బండి సంజయ్ తెలిపారు. అందుకే కొంత జాప్యం జరిగిందని ఆయన వివరించారు.