వ్యవసాయం రసాయనాలతో ఆరోగ్యానికి హాని: సహజ సేద్యం అవసరమన్న కేంద్ర మంత్రి బండి సంజయ్

జమ్మికుంటలో జరిగిన రైతు సమ్మేళనంలో కేంద్ర మంత్రి బండి సంజయ్ మాట్లాడుతూ ప్రస్తుత వ్యవసాయం రసాయనాల మయంగా మారిందని ఆందోళన వ్యక్తం చేశారు. దిగుబడి కోసం పోటీపడి రైతులు ఎరువులు, రసాయనాలు అధికంగా వాడుతున్నారని, ఫలితంగా ఆహారం ద్వారా ప్రజలు రోగాల బారిన పడుతున్నారని ఆయన తెలిపారు.

హైదరాబాద్ లో హైబ్రిడ్ మామిడి పండు తిన్న ఇద్దరు బాలికలు మరణించిన ఘటనను ప్రస్తావించిన బండి సంజయ్, తాను కూడా నగరంలో పాలు తాగి మూడు రోజులు అస్వస్థతకు గురయ్యానని చెప్పారు. ప్రస్తుతం 10 ఏళ్ల వయసులోనే పిల్లలకు బీపీ, షుగర్ వంటి వ్యాధులు వస్తున్నాయని, 90 ఏళ్ల వృద్ధులు మాత్రం ఆరోగ్యంగా ఉంటున్నారని ఆయన అభిప్రాయపడ్డారు.

ప్రకృతి వ్యవసాయాన్ని ప్రోత్సహించాల్సిన అవసరం ఉందని, రైతులు రసాయన వాడకాన్ని తగ్గించి సహజ పద్ధతులకు మారాలని కేంద్ర మంత్రి సూచించారు. గడ్డి మందులను నిషేధించినట్లే వ్యవసాయంలో వాడే రసాయనాలు కూడా హానికరమని, డాక్టర్లు కూడా ఆహారంలో రసాయన కల్తీని గుర్తిస్తున్నారని ఆయన పేర్కొన్నారు.