బ్యాంకు ఉద్యోగుల మూడు రోజుల సమ్మె వాయిదా; IBA-UFBU చర్చలు ఫలించాయి

బ్యాంకు ఉద్యోగుల మూడు రోజుల సమ్మె వాయిదా పడింది. ఆదివారం రాత్రి ఇండియన్ బ్యాంక్స్ అసోసియేషన్ (IBA), యునైటెడ్ ఫోరం ఆఫ్ బ్యాంక్ యూనియన్స్ (UFBU) మధ్య జరిగిన చర్చలు ఫలించాయి. దీంతో ఈ రోజు నుంచి బ్యాంకులు యథాతథంగా పనిచేస్తాయని UFBU ప్రకటించింది.

ఒప్పందం ప్రకారం ఐదు రోజుల పనివారంపై అత్యున్నత స్థాయి కమిటీ ఏర్పాటు చేయనున్నారు. ఈ కమిటీలో రెండు సంఘాల ప్రతినిధులు ఉంటారు. అందరి అభిప్రాయాలు తీసుకున్నాకే నిర్ణయం తీసుకుంటారు. వినియోగదారుల అభిప్రాయాలను కూడా పరిగణనలోకి తీసుకుంటారు.

శనివారాల సెలవు అంశంపై ప్రత్యేక ఉన్నత స్థాయి కమిటీ ఏర్పాటు చేస్తామని IBA తెలిపింది. స్కేల్ IV ఆపై అధికారులకు సంబంధించిన PLI పథకం మార్పులపై ప్రతిపాదనలు సిద్ధం చేసి ప్రభుత్వానికి పంపుతామని యూనియన్లు పేర్కొన్నాయి. మిగిలిన అంశాలపై త్వరలో చర్చలు జరుగుతాయని హామీ ఇచ్చారు.