మహబూబాబాద్‌లో 33 ఏళ్లుగా మర్రి చెట్టును దైవంగా పూజిస్తున్న కుటుంబం

మహబూబాబాద్ జిల్లా నరసింహులపేట మండలం వంతడుపుల తండాలో ఓ కుటుంబం 33 ఏళ్లుగా ఒక మర్రి చెట్టును దైవంగా పూజిస్తోంది. బానోత్ బిచ్చు అనే వ్యక్తి 33 సంవత్సరాల క్రితం చనిపోయాడు. ఆయనను సొంత పొలంలో ఖననం చేశారు.

ఖననం చేసిన మూడో రోజు అదే ప్రదేశంలో మర్రి మొక్క మొలిచిందని కుటుంబ సభ్యులు చెబుతున్నారు. ఆ మొక్కను తమ తండ్రి స్వరూపంగా భావించి పూజించడం మొదలు పెట్టారు. ఈ చెట్టు కోసం 30 గుంటల భూమిని కేటాయించగా, చెట్టు 10 గుంటల విస్తీర్ణంలో వ్యాపించింది.

బిచ్చు కుమారుడు బానోతు వీరన్న మాట్లాడుతూ, తండ్రి ఈ చెట్టు రూపంలో వేములవాడ రాజన్నగా వచ్చాడని కుటుంబం నమ్ముతోందన్నారు. ఏ పని మొదలు పెట్టినా ఈ చెట్టుకు మొక్కి వెళ్తామని ఆయన చెప్పారు. చెట్టు నుంచి ఒక్క ఆకును కూడా తెంపరు.

చెట్టు పక్కన దుర్గామాత ఆలయాన్ని కూడా నిర్మించారు. తండా వాసులు ఈ చెట్టును ఇలవేల్పుగా పూజిస్తున్నారు. ఈ ప్రాంతంలో ప్రభుత్వం బోరింగ్ వేసిందని, భక్తుల కోసం షెడ్డు ఏర్పాటు చేయాలని వీరన్న కోరారు.