బాపట్ల రైతులకు గోంగూర సాగుతో మంచి లాభాలు

బాపట్ల జిల్లాలో గోంగూర సాగు చేస్తున్న రైతులు మంచి లాభాలు పొందుతున్నారు. ఇంతకుముందు గుంటూరు, విజయవాడ వ్యాపారులే కొనేవారు. ఇప్పుడు హైదరాబాద్ నుంచి నేరుగా వ్యాపారులు తోటల వద్దకే వచ్చి కొనుగోలు చేస్తున్నారు.

దశాబ్దాలుగా బాపట్ల రైతులు గోంగూర పండిస్తున్నారు. గతంలో కిలో రూ.30-40 ఉన్న ధర ఇప్పుడు రూ.160కి చేరింది. ఈ ప్రాంతంలోని ఇసుక నేలలు, నీటి వసతి గోంగూరకు అనుకూలం.

రైతులు మాట్లాడుతూ, ప్రభుత్వం సబ్సిడీపై విత్తనాలు, స్ప్రింక్లర్లు ఇస్తే మరింత లాభంగా ఉంటుందని అభిప్రాయపడ్డారు. బాపట్ల ఉద్యాన అధికారి ఉషా తెలిపిన వివరాల ప్రకారం జిల్లాలో దాదాపు 200 ఎకరాల్లో, బాపట్ల మండలంలో 100 ఎకరాల్లో గోంగూర సాగవుతోంది.

ఈ పంటకు ఎకరానికి 6 కిలోల విత్తనాలు, 13 కిలోల యూరియా, 38 కిలోల సింగిల్ సూపర్ ఫాస్ఫేట్, 10 కిలోల ఎంఓపీ సరిపోతాయి. పురుగుల నివారణకు లీటరు నీటికి 5 మి.లీ. వేప నూనె మాత్రమే వాడాలి. రసాయనాలు పిచికారీ చేయకూడదు. 25-30 రోజుల్లోనే పంట చేతికొస్తుంది. ఎకరానికి 4-5 మెట్రిక్ టన్నుల దిగుబడి వస్తుంది.

గోంగూరలో ఐరన్, విటమిన్లు, మినరల్స్ అధికంగా ఉంటాయి. గర్భిణులు, చిన్న పిల్లలకు ఇది మంచి ఆహారంగా చెప్పవచ్చు. వ్యాపారులు పొలం వద్దకే వచ్చి కొనడంతో రైతులకు రవాణా ఖర్చు లేదు. మార్కెట్లో డిమాండ్ బాగా ఉండటంతో లాభదాయకంగా మారింది.