బాసర జ్ఞాన సరస్వతి అమ్మవారి బాలాలయ ప్రతిష్ఠ; ప్రధాన గర్భగుడి భక్తులకు మూసివేత

బాసరలోని శ్రీ జ్ఞాన సరస్వతి అమ్మవారి ఆలయంలో పునర్నిర్మాణం కొనసాగుతోంది. ఈ నేపథ్యంలో భక్తులకు ఇబ్బంది లేకుండా ఆలయం బాలాలయాన్ని ఏర్పాటు చేశారు.

ఆగమ శాస్త్ర నియమాల ప్రకారం విగ్రహాల ప్రాణ ప్రతిష్ఠ కార్యక్రమాన్ని పూర్తి చేశారు. 150 రూపాయల చెల్లింపుతో అక్షరాభ్యాసం చేయించే ప్రత్యేక మండపంలో అమ్మవారి విగ్రహాలను ప్రతిష్ఠించి ప్రత్యేక పూజలు నిర్వహించారు.

మధ్యాహ్నం నుంచి బాలాలయంలో అమ్మవారి దర్శనానికి భక్తులను అనుమతించారు. ప్రధాన గర్భగుడిలోకి సాధారణ భక్తుల ప్రవేశాన్ని నిలిపివేసి, అక్కడ వేదపండితులు నిత్యపూజలు, హారతి నిర్వహిస్తారని ఆలయ అధికారులు తెలిపారు.

పునర్నిర్మాణం సాఫీగా సాగడానికి ఈ తాత్కాలిక ఏర్పాటు చేసినట్లు వారు పేర్కొన్నారు.