బంగాళాఖాతంలో వాయుగుండం.. 16న తుఫాను, 18-19న ఉత్తరాంధ్రలో భారీ వర్షాలు

బంగాళాఖాతంలో ఏర్పడిన అల్పపీడనం బలపడుతోంది. ఇది రేపు (15న) ఉదయానికి వాయుగుండంగా మారనుంది. ఆ తర్వాత 16వ తేదీ ఉదయానికి తుఫానుగా బలపడే అవకాశం ఉందని భారత వాతావరణ శాఖ (IMD) తెలిపింది.

ఆగ్నేయ బంగాళాఖాతంలో ఉన్న అల్పపీడనం ఈరోజు ఉదయం 5:30 గంటలకు వెల్ మార్క్ లో పీడనంగా మారింది. ఇది ఉత్తర-వాయువ్య దిశగా కదులుతుంది. మధ్య బంగాళాఖాతం, పశ్చిమ-మధ్య బంగాళాఖాతం మీదుగా ఇది తుఫానుగా, ఆ తర్వాత తీవ్ర తుఫానుగా మారనుంది. సముద్రంలో గంటకు 120 కిలోమీటర్ల వేగంతో గాలులు వీచే అవకాశం ఉంది. ఈ నెల 19 నాటికి ఈ వ్యవస్థ తీరం వైపు కదులుతుందని అంచనా.

తుఫాను ప్రభావంతో ఉత్తరాంధ్రలో 18, 19 తేదీల్లో భారీ నుంచి అతి భారీ వర్షాలు కురిసే అవకాశం ఉంది. కొన్ని చోట్ల అత్యంత భారీ వర్షాలు నమోదు కావచ్చు. పార్వతీపురం మన్యం, అల్లూరి సీతారామరాజు, కాకినాడ, డాక్టర్ బీఆర్ అంబేద్కర్ కోనసీమ, పశ్చిమ గోదావరి, తూర్పు గోదావరి, ఏలూరు జిల్లాలు, యానాంలో భారీ వర్షాలు కురిసే అవకాశం ఉంది. ఈ ప్రాంతాలకు IMD ఆరెంజ్ అలర్ట్ జారీ చేసింది.

16వ తేదీ నుంచి గాలులు గంటకు 40 నుంచి 50 కిలోమీటర్ల వేగంతో వీచే అవకాశం ఉంది. గరిష్టంగా గంటకు 60 కిలోమీటర్ల వేగం ఉండొచ్చు. చేపల వేటకు వెళ్లిన మత్స్యకారులు 15వ తేదీ సాయంత్రానికి తిరిగి తీరానికి చేరుకోవాలని హెచ్చరికలు జారీ అయ్యాయి.

విశాఖపట్నం తుఫాను హెచ్చరిక కేంద్రం ఈ కదలికలను ఎప్పటికప్పుడు పర్యవేక్షిస్తోంది. తుఫాను తీరాన్ని ఎక్కడ దాటుతుందనే విషయం ఇంకా స్పష్టం కాలేదు. రాబోయే 24 గంటల్లో ఈ వివరాలు తెలుస్తాయని కేంద్రం అధికారి తెలిపారు. రాష్ట్ర ప్రభుత్వానికి కేంద్రం సూచనలు అందిస్తోంది. మత్స్యకారులను సురక్షితంగా తీరానికి చేర్చాలని కూడా సూచించింది.