ఉస్మానియా యూనివర్సిటీలో తపస్య స్నాతకోత్సవం: 1,000 మంది విద్యార్థులకు ప్రశంసా పత్రాలు

హైదరాబాద్ ఉస్మానియా యూనివర్సిటీలోని ఠాగూర్ ఆడిటోరియంలో తపస్య ఎడ్యుకేషనల్ ఇన్‌స్టిట్యూషన్స్ వార్షిక స్నాతకోత్సవం జరిగింది. వివిధ బ్రాంచ్‌లకు చెందిన సుమారు 1,000 మంది విద్యార్థులకు ప్రశంసా పత్రాలు అందజేశారు.

ఈ కార్యక్రమానికి ఒస్మానియా యూనివర్సిటీ వైస్ ఛాన్సలర్ ప్రొఫెసర్ కుమార్ ముఖ్య అతిథిగా హాజరయ్యారు. ఆయన చేతుల మీదుగా విద్యార్థులకు పత్రాలు అందజేశారు.

తమ విద్యార్థులు ఈ ఏడాది పలు కంపెనీల్లో ఉద్యోగాలు సాధించారని సంస్థ ప్రతినిధులు తెలిపారు. కొందరు ₹10 లక్షల వరకు ప్యాకేజీ పొందారని వారు చెప్పారు. విద్యతో పాటు ఉపాధి అవకాశాలు కల్పించడమే తమ లక్ష్యమని పేర్కొన్నారు.

హైదరాబాద్‌లో తమకు ఎనిమిది బ్రాంచులు ఉన్నాయని, సుమారు 10,000 మంది విద్యార్థులు చదువుతున్నారని ప్రతినిధులు తెలిపారు. ప్రతి సంవత్సరం ఈ స్నాతకోత్సవం నిర్వహిస్తామని చెప్పారు. ప్లేస్‌మెంట్, అకడమిక్ వివరాలతో ప్రతి విద్యార్థిని సన్మానిస్తామని వారు పేర్కొన్నారు. సహకరించిన ఒస్మానియా యూనివర్సిటీకి కృతజ్ఞతలు తెలిపారు.

విద్య వ్యక్తి అభివృద్ధికి, దేశ అభివృద్ధికి బలమైన సాధనమని వైస్ ఛాన్సలర్ ప్రొఫెసర్ కుమార్ అన్నారు. దేశ జనాభాలో 30 ఏళ్లలోపు యువత 60 శాతం ఉందని ఆయన తెలిపారు. ఈ యువశక్తిని సద్వినియోగం చేసుకోవాలని చెప్పారు. మొబైల్ టెక్నాలజీ, UPI వంటి డిజిటల్ చెల్లింపులు ఉపాధి రంగాన్ని మార్చేశాయని పేర్కొన్నారు. ప్రపంచ డిజిటల్ చెల్లింపుల్లో UPI వాటా దాదాపు 40 శాతం ఉందని ఆయన తెలిపారు. 30 ట్రిలియన్ డాలర్ల ఆర్థిక వ్యవస్థ లక్ష్యాన్ని ప్రధాని ప్రస్తావించారని గుర్తు చేశారు.