బెంగాల్‌లో BJP ప్రభుత్వ క్యాబినెట్ విస్తరణ: 35 మంది కొత్త మంత్రులు ప్రమాణ స్వీకారం

కోల్‌కతా: పశ్చిమ బెంగాల్ ముఖ్యమంత్రి సువేందు అధికారి తన మంత్రివర్గాన్ని భారీగా విస్తరించారు. 35 మంది కొత్త ఎమ్మెల్యేలు మంత్రులుగా ప్రమాణ స్వీకారం చేయడంతో రాష్ట్ర కేబినెట్ బలం 41కు చేరింది. గవర్నర్ ఆర్.ఎన్. రవి వీరికి పదవీ ప్రమాణం చేయించారు. ఈ విస్తరణలో కుల, ప్రాంతీయ, లింగ సమీకరణలను అత్యంత జాగ్రత్తగా పాటించినట్లు కనిపిస్తోంది.

కొత్తగా ప్రమాణం చేసిన వారిలో దీపక్ బర్మన్, అర్జున్ సింగ్, శంకర్ ఘోష్, మాజీ తృణమూల్ మంత్రి తపస్ రాయ్, మనోజ్ కుమార్ ఒరాన్, జగన్నాథ్ చటోపాధ్యాయ, అజయ్ పొద్దార్, స్వపన్ దాస్‌గుప్తా, డాక్టర్ శరత్ దేవత్ ముఖర్జీ, కళ్యాణ్ చక్రవర్తి తదితరులు ఉన్నారు. రాజేశ్ మహతో, ఇంద్రనీల్ ఖాన్, మాలతీ రభా రాయ్‌లకు స్వతంత్ర హోదాతో సహాయ మంత్రులుగా బాధ్యతలు అప్పగించారు.

ఈ మంత్రివర్గంలో సామాజిక వర్గాలన్నింటికీ ప్రాతినిధ్యం కల్పించడం ప్రధాన లక్ష్యంగా కనిపించింది. గిరిజనులు, మటువా సామాజిక వర్గం, రాజబన్షీ కమ్యూనిటీతో పాటు మహిళలకు కూడా స్థానం కల్పించారు. ఉత్తర బెంగాల్‌లో BJPకి బలమైన మద్దతు ఉన్నా, మమతా బెనర్జీ హయాంలో కేబినెట్‌లో కోల్‌కతాకు చెందిన వారికే ఎక్కువ ప్రాధాన్యం దక్కిందనే విమర్శలు ఉండేవి. ఈసారి నిశిత్ ప్రామాణిక్, శంకర్ ఘోష్, మాలతీ రభా రాయ్ వంటి ఉత్తర బెంగాల్ నేతలకు మంత్రి పదవులు ఇవ్వడం ద్వారా ఆ అసమతుల్యతను సరిదిద్దే ప్రయత్నం చేశారు.

ఆర్థిక వైవిధ్యం కూడా స్పష్టంగా కనిపించింది. గతంలో ఇంటి పని చేస్తూ జీవించిన కలిత, విద్యావేత్త స్వపన్ దాస్‌గుప్తా, డాక్టర్ శరత్ ముఖర్జీ, ఇంద్రనీల్ ఖాన్ వంటి వారు ఒకే మంత్రివర్గంలో చోటు దక్కించుకోవడం ప్రత్యేకత. BJPకు ఓటు వేసిన అన్ని వర్గాలకూ ప్రాధాన్యం ఇచ్చేలా ఈ క్యాబినెట్ రూపొందినట్లు విశ్లేషకులు భావిస్తున్నారు. మొత్తం 13 మందికి క్యాబినెట్ హోదా లభించగా, మిగిలిన వారికి సహాయ మంత్రిగా అవకాశం కల్పించారు. వివిధ శాఖల కేటాయింపు త్వరలో ప్రకటించనున్నారు.