రంపచోడవరంలో బెంగాల్ టైగర్‌ను బంధించేందుకు రెస్క్యూ ఆపరేషన్

రంపచోడవరం ఏజెన్సీ ప్రాంతంలో సంచరిస్తున్న బెంగాల్ పులిని పట్టుకునేందుకు అధికారులు రెస్క్యూ చర్యలు చేపట్టారు. ఉదయం గంగవరం మండలంలోని గురుగొమ్మి, పెద్దగార్లపాడు గ్రామాల వద్ద డ్రోన్ కెమెరాకు ఈ పులి చిక్కింది. ర్యాపిడ్ యాక్షన్ టీం బంధించే ప్రయత్నం చేయగా పులి తప్పించుకుంది.

ప్రస్తుతం తిరుపతి, శ్రీశైలం, విశాఖ, రాజమండ్రి నుంచి వచ్చిన నాలుగు ర్యాపిడ్ యాక్షన్ బృందాలు, హనుమాన్ బృందాలు ఈ ఆపరేషన్‌లో పాల్గొంటున్నాయి. డిప్యూటీ సీఎం, అటవీ శాఖ మంత్రి పవన్ కల్యాణ్ ఆదేశాల మేరకు వన్యప్రాణి రక్షణలో శిక్షణ పొందిన హనుమాన్ బృందాలను రంగంలోకి దించారు. పులి మెడకు ఉన్న రేడియో కాలర్ సిగ్నల్స్ ఆధారంగా దాని కదలికలను ట్రాక్ చేస్తున్నారు.

గత నెల 26వ తేదీన ఈ పులి 9 పశువులను చంపడంతో స్థానిక గిరిజన గ్రామాల ప్రజలు భయాందోళనలకు గురయ్యారు. పులిని వెంటనే పట్టుకోవాలని వారు డిమాండ్ చేశారు. సబ్ డీఎఫ్ఓ వెంకట సుబ్బారెడ్డి మాట్లాడుతూ పులిని సురక్షితంగా బంధించడానికి అన్ని ఏర్పాట్లు చేస్తున్నామని, ప్రజలు అప్రమత్తంగా ఉండాలని తెలిపారు.

ఈ ఏడాది జనవరిలో తెలంగాణలోని కన్నాపురం అటవీ ప్రాంతం నుంచి ఏలూరు జిల్లా పోలవరం మీదుగా ఈ పులి గోదావరి ప్రాంతానికి చేరింది. ఫిబ్రవరి 6న కూర్మాపురం గ్రామంలో పట్టుకొని పాపికొండల అభయారణ్యంలో విడిచిపెట్టగా, అది తిరిగి ఇక్కడే సంచరిస్తోంది. ప్రస్తుతం గోకవరం మండలం పోక్స్‌పేట సమీపంలో పులి ఉన్నట్లు గుర్తించారు.

ఆపరేషన్‌లో 100 మందికి పైగా సిబ్బంది పాల్గొంటున్నారు. పులికి మత్తు ఇంజెక్షన్ ఇచ్చి బంధించాలన్న లక్ష్యంతో చర్యలు కొనసాగుతున్నాయి. అటవీ ప్రాంతంలో ఉన్న నేపథ్యంలో పట్టుకోవడం సవాల్‌గా మారింది. అయితే మనుషులపై ఇంతవరకు దాడి చేయలేదని అధికారులు పేర్కొన్నారు. పులిని బంధించిన తర్వాతే తదుపరి నిర్ణయం తీసుకుంటామని ఫారెస్ట్ అధికారులు తెలిపారు.