కృష్ణా జిల్లాలో బెంగాలీ నాట్ల పద్ధతితో వరి సాగు.. అధిక దిగుబడి

కృష్ణా జిల్లా ఘంటసాల మండలం కొడాలి గ్రామంలో రైతులు బెంగాలీ కూలీల సహాయంతో వరి నాట్లు వేస్తున్నారు. స్థానిక కూలీల కొరత, పెరిగిన కూలీ ఖర్చులతో రైతులు ఈ ప్రత్యామ్నాయాన్ని ఎంచుకున్నారు.

బెంగాలీ కూలీలు మొక్కలను క్రమపద్ధతిలో, మొక్కల మధ్య తగిన దూరం ఉండేలా నాటుతారు. దీంతో ప్రతి మొక్క దుబ్బు బాగా చేస్తుందని, పొలంలో గాలి ప్రసరణ మెరుగై చీడపీడల ఉదృతి తగ్గుతుందని రైతులు చెబుతున్నారు.

స్థానిక కూలీలతో నాట్లు వేయిస్తే ఎకరాకు 35 బస్తాల ధాన్యం మాత్రమే వచ్చేదని, బెంగాలీ నాట్లతో 45 బస్తాల వరకు దిగుబడి సాధిస్తున్నామని రైతులు తెలిపారు. ఈ పద్ధతిలో పురుగు మందుల ఖర్చు కూడా తగ్గింది.

ఒక రైతు మాట్లాడుతూ, "పదేళ్ళుగా వ్యవసాయం చేస్తున్నా. ఐదారు సంవత్సరాల నుంచి బెంగాలీ ఊడుపు (నాట్లు) వాడుతున్నా. దిగుబడి బాగా పెరిగింది. 50 నుంచి 60 పిలకల వరకు వస్తున్నాయి. పంటకు మందుల ఖర్చే లేదు. ఎకరాకు 42 నుంచి 45 బస్తాల ధాన్యం దక్కుతోంది" అని వివరించారు.

బెంగాలీ నాట్లతో పంట గాలికి పడకుండా నిలబడుతుందని, రెండో పంటకు అనుకూలంగా ఉంటుందని రైతులు అంటున్నారు. వీరికి ఇచ్చే కూలీ ఎకరాకు రూ.4200 నుంచి రూ.4500 వరకు ఉంటుంది.

కూలీల కొరత రోజురోజుకు పెరుగుతున్న తరుణంలో ఇతర రాష్ట్రాల నుంచి వచ్చిన కూలీలు రైతులకు ఆధారంగా మారుతున్నారు.