ఇన్‌స్టాగ్రామ్ రీల్స్ చూడటంపై గొడవ: భార్యను హత్య చేసిన భర్త బెంగళూరులో అరెస్ట్

బీహార్‌కు చెందిన ధీరజ్‌ కుమార్ (24) అనే వ్యక్తి, తన భార్య రీమా కుమారి (20)ని ఇన్‌స్టాగ్రామ్ రీల్స్‌ చూడటంపై తరచూ వాగ్వాదం జరిగి, ఆగ్రహంలో ఆమెను గొంతు నులిమి హత్య చేసినట్లు పోలీసులు తెలిపారు. గత నెల 27న బెంగళూరులోని వారి నివాసంలో ఈ ఘటన చోటుచేసుకుంది.

పోలీసుల వివరాల ప్రకారం, ధీరజ్‌ కుమార్, రీమా కుమారి బీహార్‌కు చెందినవారు. ఉపాధి కోసం బెంగళూరుకు వలస వచ్చిన వీరు సుమారు 10 నెలల క్రితం ప్రేమ వివాహం చేసుకున్నారు. రీమా ఓ ప్రైవేట్ సంస్థలో పనిచేస్తుండగా, ధీరజ్ చిన్నాచితకా పనులు చేస్తూ జీవనం సాగించేవాడు.

రీమా ఖాళీ సమయాల్లో మొబైల్‌లో ఇన్‌స్టాగ్రామ్ రీల్స్ చూస్తుండటం, ఇంటి పనుల పట్ల నిర్లక్ష్యం చూపిస్తోందని భర్త ఆమెతో తరచూ గొడవపడేవాడు. నెల 27న తీవ్ర ఆగ్రహానికి లోనైన ధీరజ్, రీమా గొంతును నులిమి చంపినట్లు పోలీసు దర్యాప్తులో తేలింది. మృతదేహాన్ని పరుపులో చుట్టి ఇంట్లోనే దాచి, నిందితుడు అక్కడి నుంచి పారిపోయాడు.

జూలై 29న రీమా కనిపించకపోవడంతో ఆందోళన చెందిన స్నేహితులు ఇంటికి వెళ్లగా, అక్కడ నుంచి దుర్వాసన రావడంతో పోలీసులకు సమాచారం ఇచ్చారు. పోలీసులు ఇంటిని పరిశీలించగా, పరుపులో చుట్టిన రీమా మృతదేహం లభ్యమైంది. ధీరజ్ పారిపోయినట్లు గుర్తించిన పోలీసులు, అతని స్వస్థలం బీహార్‌లో గాలింపు చేపట్టి అరెస్టు చేశారు. అనంతరం బెంగళూరుకు తరలించి విచారించగా, నిందితుడు నేరాన్ని అంగీకరించాడు.

ప్రస్తుతం పోలీసులు కేసు నమోదు చేసి, దర్యాప్తును కొనసాగిస్తున్నారు. హత్యకు సంబంధించిన పూర్తి వివరాలు, సాక్ష్యాలు సేకరిస్తున్నట్లు అధికారులు తెలిపారు.