భద్రాచలం ఆలయ అభివృద్ధి పనులకు రేపు ప్రారంభం; రూ. 351 కోట్లు మంజూరు

భద్రాచలం రామాలయం అభివృద్ధి పనులను రేపు ప్రారంభించనున్నట్లు తెలంగాణ రాష్ట్ర దేవాదాయ శాఖ మంత్రి పొంగులేటి శ్రీనివాస్ రెడ్డి ప్రకటించారు. సచివాలయంలో ఆలయ అధికారులతో నిర్వహించిన సమీక్ష సమావేశంలో ఆయన ఈ విషయాన్ని వెల్లడించారు. ఈ ప్రాజెక్టుకు ప్రభుత్వం 351 కోట్ల రూపాయిల బడ్జెట్‌ను మంజూరు చేసింది.

ఆగమ శాస్త్ర నియమాలు పాటిస్తూ, భక్తుల మనోభావాలకు అనుగుణంగా ఆలయం పూర్వ వైభవాన్ని ప్రతిబింబించేలా పనులు చేపట్టనున్నారు. ఆధ్యాత్మికతకు భంగం కలగకుండా సంప్రదాయ శిల్పకళతో కూడిన రాతి నిర్మాణాలకు ప్రాధాన్యం ఇస్తామని అధికారులు తెలిపారు. రాబోయే 200 ఏళ్ల అవసరాలను దృష్టిలో ఉంచుకుని భవిష్యత్ తరాలకు ఆదర్శంగా ఉండే విధంగా ఈ నిర్మాణాలను చేపట్టాలని ముఖ్యమంత్రి రేవంత్ రెడ్డి సంకల్పించారు.

నిర్దేశించిన గడువులోగా పనులు పూర్తి చేసేందుకు ప్రత్యేక కార్యాచరణతో ముందుకు సాగాలని మంత్రి అధికారులను ఆదేశించారు. వచ్చే శ్రీరామనవమి నాటికి నిర్దేశించిన పనులను యుద్ధ ప్రాతిపదికన పూర్తి చేయడానికి అన్ని పనులను సమాంతరంగా చేపట్టనున్నారు.