భద్రాద్రి కొత్తగూడెంలో భారీ వర్షాలు: ములకలపల్లిలో 197 మిమీ వర్షపాతం

భద్రాద్రి కొత్తగూడెం జిల్లాలో నిన్న రాత్రి నుంచి ఎడతెరిపి లేకుండా భారీ వర్షాలు కురుస్తున్నాయి. జిల్లాలో అత్యధికంగా ములకలపల్లి మండలంలో 197 మిమీ వర్షపాతం నమోదైంది. దీంతో మండలం మొత్తం వరదల్లో చిక్కుకుంది.

వాగులు, వంకలు, చెరువులు పొంగిపొర్లుతున్నాయి. ప్రధాన రహదారులపైకి వరద నీరు చేరడంతో వాహనాల రాకపోకలు నిలిచిపోయాయి. ఇటీవల కూలిన వంతెన స్థానంలో వేసిన తాత్కాలిక మట్టి రోడ్డు కూడా వరదకు కొట్టుకుపోయింది.

తాళ్లపాయలో చెరువు అలుగుపోవడంతో డబుల్ బెడ్‌రూమ్ ఇళ్లు నీట మునిగాయి. కొన్ని గ్రామాల్లో ఇళ్లలోకి నాలుగు అడుగులకు పైగా వరద నీరు చేరింది. ఏజెన్సీ గ్రామాలకు రాకపోకలు పూర్తిగా నిలిచిపోయాయి.

జల దిగ్బంధంలో చిక్కుకున్న గ్రామాల్లో పోలీసు, రెవెన్యూ శాఖ సిబ్బంది సహాయక చర్యలు చేపట్టారు. ప్రజలను సురక్షిత ప్రాంతాలకు తరలిస్తున్నారు. తక్షణ సహాయం అందించాలని స్థానికులు కోరుతున్నారు. రోడ్లు దాటొద్దని, పొలాలకు వెళ్లొద్దని అధికారులు హెచ్చరికలు జారీ చేశారు.

ఈ ఏడాది పెద్దగా వర్షాలు లేక పొలాలు ఎండిపోతుండగా, ఇప్పుడు చెరువులు నిండుకుండలా మారాయి. అశ్వారావుపేటలోని హృదవాగు ప్రాజెక్టు నిండడంతో గేట్లను ఎత్తారు. కిన్నర ప్రాంతంలో భారీగా వరద నీరు వస్తోంది.

వేల ఎకరాల్లో పంటలు నీట మునిగాయి. పొలాల్లో నాలుగు నుంచి ఐదు అడుగుల వరకు వరద నీరు నిలిచింది. పత్తి, మిర్చి పంటలకు నష్టం జరిగిందని రైతులు ఆందోళన వ్యక్తం చేస్తున్నారు.

ఈరోజు కూడా వర్షాలు కొనసాగే అవకాశం ఉందని అధికారులు తెలిపారు. వరద మరింత పెరిగే అవకాశం ఉందని, ప్రజలు అప్రమత్తంగా ఉండాలని సూచించారు.