TTD బోర్డు సభ్యుడు భాను ప్రకాష్ రెడ్డి, తిరుపతి రుయా ఆస్పత్రిలో ఆకస్మిక తనిఖీ

తిరుపతి రుయా ఆసుపత్రిలో TTD బోర్డు సభ్యుడు భాను ప్రకాష్ రెడ్డి ఆకస్మిక తనిఖీ నిర్వహించారు.

ఆ సందర్భంగా ఆయన రోగులకు అందుతున్న వైద్య సేవలను, ఆసుపత్రి నిర్వహణలో నెలకొన్న ఆర్థిక ఇబ్బందులను పరిశీలించారు.

రాయలసీమ జిల్లాల నుంచి నిత్యం పెద్ద సంఖ్యలో పేద రోగులు ఈ ఆసుపత్రికి వస్తున్నారు. గత కొంతకాలంగా నిధుల కొరత వేధిస్తోందని, దీని వల్ల నిర్వహణ సవాళ్లు ఎదురవుతున్నాయని ఆయన తెలిపారు.

ఈ విషయాన్ని TTD చైర్మన్ బిఆర్ నాయుడు, ఈఓ దృష్టికి తీసుకెళ్లానని, వారి నుంచి సానుకూల స్పందన వచ్చిందని భాను ప్రకాష్ రెడ్డి పేర్కొన్నారు. ఆసుపత్రి అభివృద్ధికి అవసరమైన నిధులను రానున్న ధర్మకర్తల మండలి సమావేశంలో ప్రతిపాదించనున్నట్లు తెలిపారు.

ఎమర్జెన్సీ విభాగంలో ప్రస్తుతం 16-17 బెడ్లు ఉండగా, వాటిని మైనర్, మేజర్ గాయాలకు విభజించేందుకు స్థలం ఉందని ఆయన చెప్పారు. రోడ్డు పక్కన ఉన్న స్థలంలో కొత్త భవనం నిర్మిస్తే రోగులకు మరింత సౌకర్యంగా ఉంటుందని వైద్యులు సూచించారు.

1962లో నిర్మించిన ఈ ఆసుపత్రికి ఎప్పటికప్పుడు రోగుల సంఖ్య పెరుగుతోంది. పేదల కోసం ఈ ఆసుపత్రిని మెరుగుపరిచేందుకు TTD అన్ని విధాలా సహకరిస్తుందని భాను ప్రకాష్ రెడ్డి హామీ ఇచ్చారు.