భారత్ విస్తార్ AI వ్యవసాయ సేవ తెలంగాణలో అమలు కానుంది

కేంద్ర ప్రభుత్వం తీసుకొచ్చిన భారత్ విస్తార్ అనే AI ఆధారిత వ్యవసాయ వేదిక తెలంగాణలో అమలు కానుంది. ఈ సేవను రాష్ట్రంలో అమలు చేయడానికి రాష్ట్ర వ్యవసాయ శాఖ, NISG మధ్య ఒప్పందం కుదిరింది.

ఈ సేవ ద్వారా రైతులు మొబైల్ ఫోన్‌తోనే సాగు సలహాలు పొందవచ్చు. ఏ పంట ఎప్పుడు వేయాలి, ఎరువు ఎంత మోతాదులో వేయాలి, తెగులు వచ్చినప్పుడు ఏమి చేయాలి అనే వివరాలు తెలుగులో అందుతాయి. ఎవరినీ అడగకుండా ఒకే ఫోన్ ద్వారా ఈ సమాచారం రైతుకు చేరుతుంది.

వ్యవసాయం, వాతావరణ శాఖల సైంటిస్టుల సమాచారం, మార్కెట్ వివరాలు అన్నీ ఒకే చోట చేర్చి రైతుకు అందించడం ఈ వేదిక లక్ష్యం. పంటకు తెగులు, చీడపీడలు మొదలైన వెంటనే గుర్తించి ఏం చేయాలో శాస్త్రీయంగా తెలుసుకోవచ్చు. వాతావరణం ఎలా ఉంది, నేల ఎలాంటిది, మార్కెట్‌లో ధర ఎలా ఉంది అనే వివరాలను కూడా ఈ AI టూల్ చెబుతుంది.

ఈ సేవను నాలుగు దశల్లో అమలు చేయనున్నారు. రైతులకు సాగు సలహాలు, వాతావరణ సమాచారం, ముందస్తు హెచ్చరికలు సహా ఆరు ముఖ్యమైన సేవలు అందనున్నాయి. 2026-27 ఆర్థిక సంవత్సరంలో RKVY కింద కేంద్ర, రాష్ట్ర భాగస్వామ్యంతో ఇది అమలు కానుంది.