ఛత్ పూజ రద్దీకి 300కు పైగా ప్రత్యేక రైళ్లు: దక్షిణ మధ్య రైల్వే ఏర్పాట్లు

ఛత్ పూజ రద్దీ నివారణకు దక్షిణ మధ్య రైల్వే 300కు పైగా ప్రత్యేక రైళ్లు నడుపుతోంది. హైదరాబాద్, సికింద్రాబాద్ నుంచి ఉత్తరాది రాష్ట్రాలకు ఈ ప్రత్యేక రైళ్లు వెళ్తాయి. దక్షిణ మధ్య రైల్వే సీపీఆర్ఓ శ్రీధర్ ఈ వివరాలు తెలిపారు.

బీహార్, ఉత్తర ప్రదేశ్, పశ్చిమ బెంగాల్, ఒడిశా, అస్సాం తదితర ప్రాంతాలకు రైళ్లు నడుస్తున్నాయి. జైపూర్, ఢిల్లీ, ప్రయాగ్రాజ్, దానాపూర్, దర్భంగా, రక్సౌల్, బక్సర్, హౌరా, సంత్రాగచి వైపు కూడా సర్వీసులు ఉన్నాయి. రెగ్యులర్ రైళ్లతో పాటు ప్రత్యేక రైళ్లు కూడా నడుస్తున్నాయని ఆయన చెప్పారు.

సికింద్రాబాద్, కాచిగూడ, నాంపల్లి, చెర్లపల్లి, లింగంపల్లి స్టేషన్లలో రద్దీ ఎక్కువగా ఉండే అవకాశం ఉంది. ప్రయాణికుల రద్దీని నియంత్రించేందుకు RPF పోలీసులు, ఇతర బలగాలను మోహరించారు. అధికారులు రౌండ్ ద క్లాక్ షిఫ్ట్ విధుల్లో ఉంటున్నారు. హెడ్ క్వార్టర్స్ నుంచి వార్ రూమ్ ఏర్పాటు చేసి CCTV ఫుటేజ్ ద్వారా పర్యవేక్షిస్తున్నారు.

టికెట్ కౌంటర్లు అదనంగా నడుపుతున్నారు. ఆటోమేటిక్ టికెట్ వెండింగ్ మిషన్ల వద్ద ఫెసిలిటేటర్లను నియమించారు. ప్రయాణికులు క్యూలో ఎక్కువ సేపు నిలబడకుండా, రైలు మిస్ కాకుండా టికెట్లు అందించే ఏర్పాటు చేశారు.

సికింద్రాబాద్ స్టేషన్లో నిర్మాణ పనులు కొనసాగుతున్నాయి. ప్రయాణికులకు దారి తెలిసేందుకు సైనేజ్లు ఏర్పాటు చేశారు. స్టేషన్ బయట టీవీ డిస్ప్లేలు పెట్టారు. వాటిలో రైలు నంబర్, ప్లాట్ఫామ్ వివరాలు చూపిస్తున్నారు.