జగిత్యాల మార్కెట్ యార్డులో రైతుల ఆందోళన.. గేట్ల తాళాలు తీసిన పోలీసులు

జగిత్యాల జిల్లా వ్యవసాయ మార్కెట్ యార్డులో రైతులు ఆందోళన చేశారు. యార్డు గేట్లకు తాళం వేయడంపై వారు ఆగ్రహం వ్యక్తం చేశారు.

నిన్న ధాన్యం తీసుకురావాలని మార్కెట్ అధికారులు రైతులకు చెప్పారు. ఇవాళ యార్డు గేట్లకు తాళం వేశారు. దీంతో ధాన్యం లోడ్ చేసుకుని వచ్చిన ట్రాక్టర్లు యార్డు బయట రోడ్డుపై నిలిచిపోయాయి.

యార్డు ఇప్పటికే ధాన్యంతో నిండిపోయిందని రైతులు చెప్తున్నారు. కొత్తగా వచ్చే ట్రాక్టర్లను లోపలికి అనుమతించడం లేదని వారు అంటున్నారు. మార్కెట్ సిబ్బంది తమతో గొడవకు దిగుతున్నారని కూడా రైతులు ఆరోపించారు.

చివరికి పోలీసులు జోక్యం చేసుకున్నారు. దీంతో యార్డు సిబ్బంది గేట్లకు వేసిన తాళాలను తీశారు.

ఈ మార్కెట్ యార్డు ఐదు ఎకరాల్లో ఏర్పాటు చేసినట్టు చెప్పారు. కానీ వాస్తవంగా రెండు ఎకరాల స్థలమే అందుబాటులో ఉందని రైతులు చెప్తున్నారు. చుట్టుపక్కల గ్రామాల నుంచి పెద్ద సంఖ్యలో రైతులు ధాన్యం తీసుకొస్తున్నారు. లారీలు సమయానికి రావడం లేదని, కూలీల కొరత ఉందని వారు పేర్కొంటున్నారు.

సన్న ధాన్యం వేయాలని ప్రభుత్వమే ఆదేశించిందని రైతులు అంటున్నారు. అందుకే తాము పండించిన ధాన్యాన్ని అమ్ముకునే వెసులుబాటు కల్పించాల్సిన బాధ్యత ప్రభుత్వంపై ఉందని వారు చెప్తున్నారు. రైతులను దశలవారీగా మార్కెట్‌కు రప్పించి విక్రయాలు జరిగేలా ప్రణాళిక రూపొందించాలని వారు కోరుతున్నారు.

రైతులు ఎత్తి చూపుతున్న సమస్యలపై మార్కెట్ యార్డు అధికారుల స్పందన లభ్యం కాలేదు.