హైదరాబాద్‌లో భారత్ సమ్మిట్: నవంబర్ 13, 14 తేదీల్లో నిర్వహణ

హైదరాబాద్‌లో నవంబర్ 13, 14 తేదీల్లో భారత్ సమ్మిట్ జరుగుతుందని డెప్యూటీ సీఎం భట్టి విక్రమార్క తెలిపారు. ఈ సమ్మిట్‌కు 70 దేశాలకు పైగా ప్రతినిధులు హాజరవుతారని ఆయన చెప్పారు.

హైదరాబాద్‌లో ఈ సమ్మిట్‌ను రెండోసారి నిర్వహిస్తున్నట్టు భట్టి విక్రమార్క వెల్లడించారు. ఈ కార్యక్రమాన్ని రాజకీయాలకు అతీతంగా నిర్వహిస్తున్నట్టు ఆయన తెలిపారు. ప్రపంచవ్యాప్తంగా ఉన్న ప్రజాస్వామ్యవాదులను, లిబరల్, ప్రోగ్రెసివ్ భావాలు కలిగిన వారిని ఈ సమ్మిట్‌కు ఆహ్వానిస్తున్నట్టు ఆయన చెప్పారు. ప్రపంచానికి ఒక విజన్ అందించడమే ఈ సమ్మిట్ లక్ష్యమని భట్టి విక్రమార్క తెలిపారు.

సమ్మిట్‌లో 1,000 మందికి పైగా ప్రజా ప్రతినిధులు పాల్గొంటారని ఆయన తెలిపారు. దేశాధినేతలుగా పని చేసిన వారు, పాలసీ మేకర్స్, థింకర్స్ కూడా హాజరవుతారని భట్టి విక్రమార్క చెప్పారు. వారు ఇప్పటికే తమ హాజరు సమ్మతిని తెలియజేశారని ఆయన వివరించారు.

ఈ సమ్మిట్‌లో రాహుల్ గాంధీ, ఖర్గే సైతం పాల్గొంటారని భట్టి విక్రమార్క తెలిపారు. సమ్మిట్‌లో పాల్గొనేందుకు అన్ని రాజకీయ పార్టీల నేతలను ఆహ్వానించినట్టు ఆయన చెప్పారు.