డిప్యూటీ సీఎం భట్టి విక్రమార్క బర్క్లీలో తెలంగాణ క్లీన్ ఎనర్జీ నమూనాల ప్రదర్శన

తెలంగాణ డిప్యూటీ ముఖ్యమంత్రి భట్టి విక్రమార్క అమెరికా పర్యటనలో భాగంగా యూనివర్సిటీ ఆఫ్ కాలిఫోర్నియా బర్క్లీలోని ఇండియా ఎనర్జీ అండ్ క్లైమేట్ సెంటర్‌ను సందర్శించారు.

అక్కడ నిర్వహించిన ఉన్నత స్థాయి సమావేశంలో ఆయన తెలంగాణ రాష్ట్ర స్వచ్ఛ ఇంధన వ్యూహాలను వివరించారు. 2030 నాటికి 500 గిగావాట్ల నాన్‌-ఫాసిల్ సామర్థ్యం సాధించేందుకు భారతదేశం రూపొందించిన ప్రణాళికల్లో తెలంగాణ పాత్ర గురించి చర్చించారు.

సౌరశక్తితో సహా పునరుత్పాదక ఇంధన రంగంలో తెలంగాణ సాధించిన ప్రగతిని ఆయన వివరించారు. గ్రామీణ ప్రాంతాల్లో మహిళా స్వయం సహాయక సంఘాల సహకారంతో సోలార్ ప్రాజెక్టుల నిర్వహణ, పీఎం కుసుం పథకం ద్వారా రైతులకు స్వచ్ఛ ఇంధనం అందించడం వంటి నమూనాలను అంతర్జాతీయ ప్రతినిధులు ప్రశంసించినట్లు భట్టి విక్రమార్క తెలిపారు.

24 గంటల నాణ్యమైన విద్యుత్ సరఫరాతో పాటు క్లీన్ టెక్ పరికరాల తయారీ రంగాన్ని ప్రోత్సహిస్తున్నామని ఆయన చెప్పారు. సిలికాన్ వ్యాలీ ఆవిష్కరణలను, కాలిఫోర్నియా ఇంధన రంగ అనుభవాలను తెలంగాణలో ఉపయోగించుకుంటామని కూడా అన్నారు.