కొత్తగూడెం ప్రభుత్వ ఆసుపత్రిలో గర్భిణి వార్డులోనే ప్రసవం; నేలపై పడిన శిశువుకు తల గాయాలు

భద్రాద్రి కొత్తగూడెం జిల్లాలోని రామవరం ప్రభుత్వ మాతా శిశు ఆసుపత్రిలో ఒక గర్భిణి వార్డులో నిలుచున్న చోటనే ప్రసవించింది. ఈ సంఘటనలో నవజాత శిశువు నేలపై పడి తలకు తీవ్ర గాయమైంది.

ములకలపల్లి మండలం కుంకారపాడు గ్రామానికి చెందిన భవాని అనే మహిళ మొదటి కాన్పు కోసం ఈ ఆసుపత్రికి వచ్చింది. ఆమెకు ప్రసవ నొప్పులు వస్తున్నాయని కుటుంబ సభ్యులు పదే పదే వైద్యులకు, సిబ్బందికి తెలిపినా సరైన స్పందన లేదని ఆరోపిస్తున్నారు. వారి నిర్లక్ష్యం కారణంగా భవాని నిలుచున్న చోటనే ప్రసవం జరిగిందని, బిడ్డ కిందపడి తల పగిలి రక్తస్రావం అయిందని బంధువులు తెలిపారు.

దీనిపై ఆసుపత్రి వైద్యులు, సిబ్బందిపై కుటుంబ సభ్యులు తీవ్ర ఆగ్రహం వ్యక్తం చేశారు. వారిని ప్రశ్నించగా, డాక్టర్లు ‘మాకు ఎప్పుడు ఆపరేషన్ చేయాలో తెలుసు’ అని నిర్లక్ష్యంగా సమాధానమిచ్చారని ఆరోపించారు.

సమాచారం అందుకున్న పోలీసులు ఆసుపత్రికి చేరుకుని ఘటనపై వివరాలు సేకరించి కేసు నమోదు చేశారు. దర్యాప్తు కొనసాగుతోంది. శిశువు ఆరోగ్య స్థితిపై ఆసుపత్రి అధికారులు ఇంకా స్పందించలేదు.