భోగాపురం విమానాశ్రయం: నీటి సరఫరా, కనెక్టివిటీ రోడ్లు, విద్యుత్‌పై ఆందోళనలు

భోగాపురం అంతర్జాతీయ విమానాశ్రయం ప్రారంభోత్సవానికి ఏర్పాట్లు జరుగుతున్నాయి. కానీ విమానాశ్రయ నిర్మాణం పూర్తయినప్పటికీ నీటి సరఫరా, కనెక్టివిటీ రోడ్లు, విద్యుత్ వ్యవస్థలు వంటి మౌలిక సదుపాయాలు ఇంకా అసంపూర్తిగా ఉన్నాయని సమాచారం.

విమానాశ్రయానికి రోజుకు 5 మిలియన్ లీటర్ల నీరు అవసరం అని అంచనా. ప్రస్తుతం చంపావతి నది నుండి 1.7 మిలియన్ లీటర్లు మాత్రమే అందుతుండగా, మిగిలిన నీటిని తారకరామ తీర్థసాగర్ నుండి తీసుకురావాల్సి ఉంది. ఈ ప్రణాళిక పూర్తి స్థాయిలో అమలుకాలేదు.

కనెక్టివిటీ రోడ్ల విషయంలో తొలుత 15 కీలక రోడ్లు అభివృద్ధి చేస్తామని ప్రకటించినా, ప్రస్తుతం ఏడు రోడ్ల నిర్మాణమే జరుగుతోంది. నాలుగు ప్రధాన వంతెనలతో పాటు పలు చిన్న వంతెనలు, కల్వర్ట్ల నిర్మాణం కొనసాగుతోంది. ఈ రోడ్లు విమానాశ్రయాన్ని విశాఖ, విజయనగరం, NH-16 లకు అనుసంధానించాలని లక్ష్యంగా పెట్టుకున్నారు. అయితే ట్రాఫిక్ నిర్వహణ, ప్రయాణికుల రాకపోకలపై ప్రభావం ఉంటుందనే సందేహాలు వ్యక్తమవుతున్నాయి.

విద్యుత్ సరఫరా కోసం ప్రత్యేక గ్రిడ్ నిర్మిస్తామని ప్రకటించినా, ఆ వ్యవస్థ ఇంకా పూర్తి కాలేదని తెలుస్తోంది. ట్రంపెట్ ఇంటర్చేంజి సహా పలు బాహ్య మౌలిక సదుపాయాల పనులు ఇంకా కొనసాగుతూనే ఉన్నాయి. దీంతో ప్రారంభోత్సవంపై ప్రభుత్వం ఎక్కువ దృష్టి పెట్టి మౌలిక సదుపాయాల పూర్తిపై నిర్లక్ష్యంగా వ్యవహరిస్తోందా అనే ప్రశ్నలు వినిపిస్తున్నాయి.

విమానాశ్రయ నిర్వాహక సంస్థ GMR అంతర్గతంగానూ ఈ పరిణామాలపై ఆందోళన వ్యక్తం చేస్తున్నట్లు సమాచారం. మౌలిక సదుపాయాలు సిద్ధంగా లేకుండా కార్యకలాపాలు మొదలైతే ప్రయాణికుల సంఖ్యపై ప్రభావం పడుతుందని భావిస్తున్నారు. నిపుణులు, స్థానికులు కూడా ప్రారంభానికి ముందే అన్ని వసతులు పూర్తి కావాలని కోరుతున్నారు.