భోగాపురం విమానాశ్రయంతో ఉత్తరాంధ్రలో ఉద్యోగాలు, పెట్టుబడులు పెరుగుతాయని నటుకుల మోహన్ అభిప్రాయం

భోగాపురం అంతర్జాతీయ విమానాశ్రయం నిర్మాణం ఉత్తరాంధ్రలో ఉద్యోగాలు, పెట్టుబడులు పెంచుతుందని ఎయిర్ ట్రావెలర్స్ అసోసియేషన్ ఆఫ్ ఇండియా నేషనల్ వైస్ ప్రెసిడెంట్ నటుకుల మోహన్ అభిప్రాయపడ్డారు.

ఆయన మాట్లాడుతూ ఈ విమానాశ్రయం వల్ల శ్రీకాకుళం జిల్లా పర్యాటక రంగం అభివృద్ధి చెందుతుందన్నారు. అరసవెల్లి సూర్యనారాయణస్వామి ఆలయం, శ్రీకూర్మం, ముఖలింగం వంటి పుణ్యక్షేత్రాలను కలుపుతూ ఒక టూరిజం సర్క్యూట్ ఏర్పాటు చేస్తే ఎక్కువమంది పర్యాటకులు వస్తారని ఆయన సూచించారు.

ఫార్మా రంగానికి ఈ విమానాశ్రయం 30 కిలోమీటర్ల దూరంలో ఉండటంతో ఔషధ ఎగుమతులు వేగంగా జరుగుతాయని, ఇది వ్యాపారాన్ని ప్రోత్సహిస్తుందన్నారు. అలాగే కార్గో సేవల విస్తరణపై మాట్లాడుతూ, జిల్లాలో గ్రానైట్, జీడిపప్పు, రొయ్యలు, చేపలు, వైద్య పరికరాలు వంటి ఎగుమతులు కార్గో విమానాల ద్వారా తక్కువ ఖర్చుతో సాధ్యమవుతాయన్నారు.

విమాన ఛార్జీల విషయంలో మోహన్ మాట్లాడుతూ, జీఎంఆర్ సంస్థ తక్కువ ఛార్జీలు విధిస్తే ఎక్కువ విమానయాన సంస్థలు సేవలు ప్రారంభిస్తాయన్నారు. దీనివల్ల ప్రయాణికుల సంఖ్య పెరిగి, టికెట్ ధరలు తగ్గుతాయని ఆయన అభిప్రాయపడ్డారు. ఉదాహరణకు విశాఖపట్నం నుంచి సింగపూర్‌కు ప్రస్తుతం రూ.10,000 టికెట్ ఉంటే, భోగాపురం నుంచి రూ.8,000-9,000కే దొరుకుతుందన్నారు.

భోగాపురం విమానాశ్రయం ఉత్తరాంధ్ర ముఖచిత్రాన్నే మారుస్తుందని మోహన్ తెలిపారు. రానున్న రోజుల్లో ఈ ప్రాజెక్టు ప్రాంత అభివృద్ధికి కేంద్ర బిందువుగా నిలుస్తుందన్నారు.