భోగాపురం విమానాశ్రయం సిద్ధం; టీడీపీ-వైకాపా మధ్య క్రెడిట్ వివాదం

భోగాపురం విమానాశ్రయం త్వరలో వాణిజ్య విమానాలకు అందుబాటులోకి రానుంది. విమానాల లాండింగ్ షెడ్యూల్ కూడా ఖరారైంది. అయితే ఈ విమానాశ్రయం పూర్తి కావడంపై అధికార టీడీపీ నేతృత్వంలోని ఎన్డీయే కూటమికి, ప్రతిపక్ష వైఎస్ఆర్ కాంగ్రెస్ పార్టీకి మధ్య క్రెడిట్ వివాదం మొదలైంది.

టీడీపీ నేతలు, కేంద్ర మంత్రి రామ్మోహన్ నాయుడు మాట్లాడుతూ, గత ప్రభుత్వం ఈ విమానాశ్రయాన్ని అడ్డుకుందని ఆరోపించారు. జగన్మోహన్ రెడ్డి 'ఎర్ర బస్సు రాని చోట ఎయిర్ బస్సు ఎందుకు' అని అన్నారని, ఆ ప్రాంతాన్ని హేళన చేశారని వారు విమర్శించారు. తాము అన్ని అడ్డంకులు అధిగమించి ప్రాజెక్టును పూర్తి చేశామని చెప్పారు.

వైఎస్ఆర్ కాంగ్రెస్ నేతలు స్పందిస్తూ, 2023లో జగన్మోహన్ రెడ్డి స్వయంగా శంకుస్థాపన చేశారని, 2026లో విమానాలు ఎగురుతాయని అప్పుడే ప్రకటించారని తెలిపారు. జగన్ వ్యాఖ్యలను ఉద్దేశపూర్వకంగా వక్రీకరించారని, భూమి కోల్పోయిన రైతుల విషయంలో చేసిన ప్రస్తావనపై విష ప్రచారం చేస్తున్నారని వైఎస్ఆర్ కాంగ్రెస్ నేత సజ్జల రామకృష్ణారెడ్డి విమర్శించారు. తమ హయాంలోనే విమానాశ్రయ పనులు ఎక్కువగా పూర్తయ్యాయని వారు చెప్పారు.

భోగాపురం విమానాశ్రయం ఉత్తరాంధ్ర అభివృద్ధికి కీలకంగా భావిస్తున్నారు. పారిశ్రామిక, పర్యాటక రంగాలకు ఇది ఊతమిస్తుందని అంచనా. వాణిజ్య విమాన సర్వీసులు త్వరలో ప్రారంభమవుతాయని సమాచారం.