భోగాపురం ఎయిర్‌పోర్ట్‌లో రాష్ట్రం వ్యయం రూ.1,582 కోట్లు; కేంద్రానికి ప్రత్యక్ష వాటా లేదు

భోగాపురం అంతర్జాతీయ విమానాశ్రయం నిర్మాణానికి ఆంధ్రప్రదేశ్ ప్రభుత్వం రూ.1,582.97 కోట్లు ఖర్చు చేసింది. కేంద్ర ప్రభుత్వానికి ఇందులో ప్రత్యక్ష నిధుల వాటా లేదు.

ఈ విమానాశ్రయం పబ్లిక్-ప్రైవేట్ భాగస్వామ్యం (PPP) కింద నిర్మితమవుతోంది. GMR సంస్థ రూ.4,727 కోట్ల అంచనా వ్యయంతో దీనిని డిజైన్, బిల్డ్, ఫైనాన్స్, ఆపరేట్ అండ్ ట్రాన్స్ఫర్ (DBFOT) విధానంలో అభివృద్ధి చేస్తోంది. ప్రాజెక్టు నిర్వహణ కోసం GMR విశాఖపట్నం ఇంటర్నేషనల్ ఎయిర్‌పోర్ట్ లిమిటెడ్ (GVIAL) అనే ప్రత్యేక సంస్థను ఏర్పాటు చేసింది. 2,703 ఎకరాల్లో ఇంటిగ్రేటెడ్ ప్రాజెక్టుతో పాటు ఏవియేషన్ హబ్, యూనివర్సిటీ, రోడ్ల వంటి మౌలిక సదుపాయాలు ఏర్పాటు కానున్నాయి.

రాష్ట్ర ప్రభుత్వం చేసిన వ్యయంలో భూసేకరణకు రూ.944 కోట్లు, నీటి సరఫరాకు రూ.75 కోట్లు, విద్యుత్ కనెక్షన్‌కు రూ.97 కోట్లు, ఫండెడ్ వర్క్స్‌కు రూ.134 కోట్లు, కనెక్టివిటీకి రూ.300 కోట్లు, కనెక్టివిటీ రోడ్ల కోసం రూ.3.25 కోట్లు, ఇరిగేషన్ కెనాల్ పనులకు రూ.27 కోట్లు ఖర్చు చేసింది. అప్రోచ్ రోడ్లు, ఇతర సహాయక మౌలిక సదుపాయాలకూ రాష్ట్రం నిధులు కేటాయించింది.

కేంద్రం డైరెక్ట్ నిధులు ఇవ్వనప్పటికీ, ఎయిర్ ట్రాఫిక్ కంట్రోల్, DGCA ఏరోడ్రోమ్ లైసెన్స్, ఫైర్, పర్యావరణ అనుమతులు వంటి కీలక క్లియరెన్స్‌లు ఇచ్చింది. కేంద్ర పౌర విమానయాన శాఖ మంత్రి రామ్మోహన్ నాయుడు సమన్వయంతో ఈ అనుమతులు వేగవంతమయ్యాయి.